K Mahendranath Salethoor

ತುಳುನಾಡ ಬೆರ್ಮೆರ್ ಓಲುಲ್ಲೆರ್?

---

ಪ್ರಕೃತಿ ಆರಾಧಕ ತುಳುವೆರೆಗ್ ತನ್ಕ್ ತೋಜಂದಿನ, ತನ್ಕ್ ಸಹಾಯ ಮಲ್ಪುನ ಒಂಜಿ ಸಗ್ತಿದ ಮಿತ್ತ್ ನಂಬೊಳಿಗೆ ಇತ್ತ್ಂಡ್ ವಿನಃ ಅಕ್ಲೆಗ್ ಆಕಾರದ ಮಿತ್ತ್ ನಂಬೋಳಿಗೆ ಇಜ್ಜಾಂಡ್. ಆ ನಂಬೊಳಿಗೆದ ಸಗ್ತಿಯೇ ಬೆರ್ಮೆರ್. ಬೊಮ್ಮ - ಬಿರ್ಮ - ಬೆರ್ಮ - ಬ್ರಹ್ಮ ಪಂಡ್ದ್ ಬೇತೆ ಬೇತೆ ಒರುಟು ಅರಾಧನೆ ಮಲ್ಪುನ ಬೆರ್ಮೆರ್ ಪಂಡ ನಮ್ಮ ಗೇನೊಗು ಎಕ್ಕಾಂದಿನಾತ್ ಮಲ್ಲ ಸಗ್ತಿಂದ್ ಬೆರ್ಮೆರೆನ್ ದೇವೆರಾದ್ ತುಳುವೆರ್ ನಂಬಿಯೆರ್. ಅಕ್ಲೆಗ್ ಕಣ್ಣ್ ಗ್ ತೋಜಂದಿ ಸಗ್ತಿಗ್ ಪುದರ್ ದೀಯರೆ ತೆರಿತಿಜಿ. ಆ ಮಲ್ಲ ಆಕಾರೊನ್ಲಾ ಕಲ್ಪನೆ ಮಲ್ಪರೆ ಅಕ್ಲೆಗ್ ಆತಿಜಿ. ಆ ಸಗ್ತಿದ ಆಕಾರ ಅಕುಲು ಕಲ್ಪನೆ ಮಲ್ಪುನೆಡ್ದ್ ಮಲ್ಲಾದಿತ್ತ್ಂಡ್. ಬೆರ್ಮೆರೆಗ್ ಮಾತ್ರ ಉಂಡು ಮಲ್ಪರೆ, ಲೆತೊಂದು ಪೋಯೆರೆ ಅಧಿಕಾರ ಉಪ್ಪುನಿಂದ್ ತುಳುವೆರ್ ತೆರಿದಿತ್ತೆರ್. ಉಂದೆಕ್ ತುಳುನಾಡ ಸಿರಿಕುಲ್ನ ಆರಾಧನೆಡ್ ಬರ್ಪುನ ಕೆಲವು ಪಾತ್ರೊಲೇ ಸಾಗ್ಸಿ. ಬೆರ್ಮೆರೆ ಸೃಷ್ಟಿನ್ ಪುರಾಣದ ಆಧಾರದಕುಲು ಜಗತ್ತ್ ಬ್ರಹ್ಮ ಸೃಷ್ಠಿ ಪನ್ಪೆರ್. ಬ್ರಹ್ಮ ಪಂಡಲಾ ಮಲ್ಲನ್ದೇ ಅರ್ಥ. ತುಳುನಾಡ ಪುಟ್ಟು ಪುರಪು ತೂನಗ ತುಳುನಾಡ್ ಬೆರ್ಮೆರೆ ಸೃಷ್ಟಿಂದ್, ಕುಡು ಅರಿತ ಉದಿಪುದ ತುಳುನಾಡ್ಂದ್ ತೆರಿನಕುಲು ಪನ್ಪೆರ್. ಬೆರ್ಮೆರೆ ಆರಾಧನೆ ಪ್ರಧಾನವಾದ್ ಆಲಡೆಲೆಡಿತ್ತ್ಂಡ್. ಮೂಲ ಮೈಸಂದಾಯೆಲಾ ಬೆನ್ನಿ ಸಾಗೊಳಿ ಸಂಸ್ಕೃತಿದ ಒರುವಾದಿತ್ತ್ಂಡ್. ಮೂಲು ಕುಡು ಅರಿತ ಬಿಲೆ ನೆಗತ್ ತೋಜುಂಡು. ಜೈನೆರೆ ಆರಾಧನೆಡ್ ಬೆರ್ಮೆರೆನ್ ಯಕ್ಷೆರೆನೊಟ್ಟುಗು ಗೋಡ್ಯಾದ್ ಬ್ರಹ್ಮಂದೇ ಪನೊಂತೆರ್. ಯಕ್ಷ ಬ್ರಹ್ಮ, ನಾಗಬ್ರಹ್ಮ ಉಂದೆಟ್ ಈ ಸ್ಪಷ್ಟತೆ ತಿಕ್ಕುಂಡು. ಅಕುಲು ಓಲ್ಲಾ ಬೆರ್ಮೆರ್ ಪನ್ಪುಜೆರ್. ಪುರಾಣ ವೈದಿಕ ಆರಾಧನೆ ತುಳುನಾಡುಗ್ ಬತ್ತಿ ಬೊಕ್ಕ, ವೈದಿಕ ಪುರಾಣೀಕರಣದಕುಲ್ಲ ಬ್ರಹ್ಮ ಪಂಡುದೇ ಲೆತ್ತೆರ್. ಆಂಡ ದ್ರಾವಿಡ ಶೂದ್ರ ತುಳುಧರ್ಮದ ತುಳುವೆರ್ ಮಾತ್ರ ಬೆರ್ಮೆರ್ ಪಂಡುದೇ ಅನಾದಿರ್ದೇ ಪನೊಂದು ಬತ್ತೆರ್. ತುಳುನಾಡ ಮೂಲ ಕೆಲವೊಂಜಿ ಜನಾಂಗೊಲು ಬೆರ್ಮೆರೆನ್ ಕಂಬೆರ್ಲುಂದು ಆರಾಧನೆ ಮಲ್ಪುನೊಟ್ಟುಗು ಸುರುತ ಪೂಜೆನ್ ಬೆರ್ಮೆರೆಗ್ ಸಂದಾವೆರ್.

ತುಳುವೆರೆ ಆದಿಡ್ ಬೆರ್ಮೆರೆನ್ ರೂಪ ಇಜ್ಜಂದಿ ಕಲ್ಲುಡ್ ಆರಾಧನೆ ಮಲ್ತೊಂದು ಬತ್ತೆರ್. ಎರಿಯಾಕ್ಲು ತನ್ಕುಲೊಟ್ಟುಗು ಉಪ್ಪುನ, ತನ್ಕುಲೆಗ್ ತೆರಿಯಂದಿನ ಸಗ್ತಿ ದಾದಂದ್ ತೆರಿಯಂದೆ ಆ ಸಗ್ತಿನ್ ಬೇರ್ಮೆರುಂದು ಪಂಡೆರ್. ಅಳಿಯ ಕಟ್ಟುಡ್ ಬರ್ಪುನ ಎಚ್ಚಿನ ತುಳುವೆರೆಗ್ ಬೆರ್ಮೆರೇ ದೇವೆರಾದ್ ಉಲ್ಲೆರ್. ಬೆರ್ಮೆರೆಡ್ದ್ ಬೊಕ್ಕ ತುಳುನಾಡುಗ್ ದೈವೊಲು ಬತ್ತಾಂದ್ ತೇರಿನಕ್ಲೆ ಅಭಿಪ್ರಾಯ. ಬೆರ್ಮೆರೇ ಸತ್ಯ, ಚಿತ್ತ, ಧರ್ಮೊಲೆನ್ ಉಂಡು ಮಲ್ತೆರುಂದುಲಾ ಪನ್ಪೆರ್. ಬಿರುವೆರೆಗ್ ಆರಾಧ್ಯ ದೈವ ಕೋಟಿ ಚೆನ್ನಯೆರಾಂಡ, ಕೋಟಿ ಚೆನ್ನಯೆರ್ನ ಆರಾಧ್ಯ ದೈವ ಕೆಮ್ಮಲಜೆ(ಕೆಮ್ಮಲೆ)ದ ಬೆರ್ಮೆರ್. ಮುಗ್ಗೆರ್ಲೆಗ್ ಮುದ್ದ ಕಲಲ, ಪೊಸ ಕಲಲೆ ಆರಾಧ್ಯ ದೈವೊಲಾಂಡ, ಬೆರ್ಮೆರ್ ದೇವೆರ್. ಬಂಟೆರೆಗ್ ಸಿರಿ ದೈವಲಾ ಅಂದ್, ದೇವೆರ್ಲಾ ಅಂದ್ಂದು ಆಂಡ ಸಿರಿನ ಆರಾಧ್ಯ ದೇವೆರ್ ಬೆರ್ಮೆರ್. ಆಂಡ ಇನಿ ಆಲಡೆಲೆದ ಬೆರ್ಮೆರ್ ಮಾಯಕಾದ್ ಬ್ರಹ್ಮಲಿಂಗೇಶ್ವರ, ಮಹಾಲಿಂಗೇಶ್ವರ ಆದ್ ಅಡೆಗ್ ಈಸರ ದೇವೆರೆ ಕಲ್ಪನೆ ಬತ್ತುಂಡ್. ಮೂಲೊಡು ತುಳುವೆರ್ ಆಕಾರ ಇಜ್ಜಂದಿ ಕಲ್ಲುಡ್ ಬೆರ್ಮೆರೆನ್ ಆರಾಧನೆ ಮಲ್ತೆರ್ಡ ಕಾಲಾನುಭಾಗೊಡು ಬೆರ್ಮೆರೆನ್ ಲಿಂಗದ ಒರುಟು ಆರಾಧನೆ ಮಲ್ಪರೆ ಸುರು ಮಲ್ತೆರ್. ನಡುಟು ಮಲ್ಲ ಒಂಜಿ ಲಿಂಗ, ಅಂಚಿಂಚಿ ಎಲ್ಯ ರಡ್ಡ್ ಲಿಂಗೊಲೆಡ್ ಬೆರ್ಮೆರೆನ್ ಆರಾಧನೆ ಮಲ್ತೊಂದು ಬತ್ತೆರ್. ಮೂಲು ಈ ಲಿಂಗ ಈಸರನ ಕಲ್ಪನೆಡ್ ಮಹಲಿಂಗೇಸರ, ಬ್ರಹ್ಮಲಿಂಗೇಸರ ಇಂಚ ಬೆರ್ಮೆರೆ ಪುದರ್ ಈಸರ ಆದ್ ಬೆರ್ಮೆರ್ ಮದೆಕ್ ಸೇರ್ಯೆರ್. ನಮ ಮೂಲ ಗೊತ್ತಿಜ್ಜಂದೆ ಪೊಸತ್ ಬತ್ತಿನವೇ ಸತ್ಯಂದ್ ನಂಬುದು ಮೂಲೊನು ಬುಡ್ದು ಬುಡ್ತ. ಅಂಚಾದ್ ಬೆರ್ಮೆರೆನೊಟ್ಟುಗು ಕಾಲಾನುಭಾಗೊಡು ನಾಗನ್ ಗೋಡ್ಯಾದ್ ನಾಗಬೇರ್ಮ, ನಾಗಬ್ರಹ್ಮ ಮಲ್ತೆರ್. ಬೆರ್ಮೆರೇ ಬೇತೆ, ನಾಗೆನೇ ಬೇತೆ. ನಾಗನ್ಲಾ ತುಳುವೆರ್ ದೈವದ ಒರಟು ತೂಯಿನಕ್ಲು. ಕಾಲ ಕರಿಲೆಕ ನಾಗೆಲಾ ದೇವೆರಾದ್ ಪೋಂಡು. ತುಳುನಾಡ ಆದಿ ದೈವ ಬೆರ್ಮೆರ್ ಬೂಮಿ ಉಂಡಾನಗ ಉಂಡಾಯಿ ಸಗ್ತಿಂದ್ಲಾ ಪನ್ಪೆರ್. ಮಲ್ಲ ಮಲ್ಲ ದೇವಾಲ್ಯೊಡು ದೈವೊಲೆಗ್ ಆರಾಧನೆ ನಡಪುನ ದುಂಬು ಬೆರ್ಮೆರೆಗ್ ದೇವೆರಾದ್ ಆರಾಧನೆ ನಡತೊಂತುಂಡು. ತುಳುವೆರೆ ಮೂಲದೈವ ಬೆರ್ಮೆರೆನ್ ಬನೊಟು ಆರಾಧನೆ ಮಲ್ತೊಂದಿತ್ತೆರ್. ನಾಗೆ ಬೊಕ್ಕ ಲೆಕ್ಕೆಸಿರಿ ಬನೊಟು ಉಪದೈವೊಲಾದಿತ್ತ. ದುಂಬುಗು ಲಿಂಗ ರೂಪೊಡು ಒಂಜಿ ಮಲ್ಲ ಲಿಂಗ ಬೆರ್ಮೆರಾದ್, ಅಂಚಿಂಚಿದ ರಡ್ದು ಎಲ್ಯ ಲಿಂಗೊಲು ಲೆಕ್ಕೆಸಿರಿ ಬೊಕ್ಕ ನಾಗನ ಒರುವಾದ್ ಆರಾಧನೆ ಪಡೆಯೊಂದಿತ್ತುಂಡು. ಗುತ್ತುಬರ್ಕೆಲೆಡ್ ದುಂಬುದ ಕಾಲೊಡು ರಾಜಂದೈವೊಲೆನ್ ನಂಬೊಡಾಂಡ ಅವೆಕ್ ಸಮ್ಮಂದ ಪಟ್ಟುದ್ ಬನೊಕ್ಲಿಪ್ಪೊಡಾಂಡ್. ಅವು ನಿಯಮ ಆದಿತ್ತುಂಡು. ದೈವದ ಬಲತುಡು ಉಂತುದು ದೈವೊಗು ಬಲಕೊರ್ಪುನ ಬಿರ್ಮೆರೆಗ್ ಸುರುತ ತಂಬಿಲ ಕೊರೊಂದಿತ್ತೆರ್. ಬನೊಕು ತಾಗುದಿತ್ತುದ್ ಕಂಬುಲದ ಕಂಡೊಲಿತ್ತ. ಕಂಬುಲದ ಕಂಡೊಡು ಪೂಕರೆ ಪಾಡ್ನಗ ಬೆರ್ಮೆರೆಗ್ ನೇಮಲ ನಡತೊಂದಿತ್ತುಂಡ್. ಇನಿಕ್ಲಾ ಬಂಟಾಲ ಕಾಡಬೆಟ್ಟುಡು ಜೈನ ಮನೆತನೊಡು ಈ ಆರಾಧನೆ ನಡತೊಂದುಂಡು. ವೈದಿಕ ಆರಾಧನೆ ತುಳುನಾಡುಗ್ ಬತ್ತಿ ಬೊಕ್ಕ ಮೂರ್ತಿ ಪೂಜೆಲು ಸುರಾದ್ ಮೂರ್ತಿ ಇಜ್ಜಂದಿ ಬೆರ್ಮೆರೆಗ್ ಕುದುರೆದ ಮಿತ್ತ್ ಕುಲ್ದಿನ ಮೂರ್ತಿ ಬತ್ತುಂಡ್. 'ಏಳ್ ಕಡಲ್ದ ನಡುಟು, ಬೊಲ್ಯ ಕುದುರೆದ ಮಿತ್ತ್, ಬೊಲ್ಯ ಸತ್ತಿಗೆದ ಅಡಿಟ್ ಬೂಮಿ ಉಂಡಾನಗ ಉಂಡಾಯಿ ಬೆರ್ಮೆರ್ ಬೂಮಿ ಬಾರಗೆ ಬಾಲೆ ಕನ್ಯಾವು ಲೆಕ್ಕೆಸಿರಿನ್ ನಾಲ್ ಕಾರ ಮೈಸಂದಾಯನ್, ಏಳ್ವೆರ್ ಸಿರಿಕುಲು, ಒರಿ ಕುಮಾರನ್, ನಾಗ, ಸರ್ಪನಕ್ಲೆನ್ ಉಂಡು ಮಲ್ತೆರ್' ಪಂಡ ಬೆಮ್ಮೆರೆನ ಸಾನಿಧ್ಯದ ದುನ್ನ ಏತುಂದ್ ನಮಕ್ ತೆರಿಯು.

ಬೆಮ್ಮೆರೆನ ಪುರಪು ಪೊಸ ಶಿಲಾಯುಗದಾತ್ ಪಿರಾಕ್ದವು ಪನ್ಪಿನೆಕ್ ಸಾಕ್ಷಿ ತಿಕುದುಂಡ್. ಕಾಪು(ಒಡಿಪು ಜಿಲ್ಲೆ) ಪಡುಮಾರ್ನಾಡ್ ಗ್ರಾಮ ಪಂಚಾಯಿತಿದ ಮಾಳ ಕಾಲನಿಡ್ ಪೊಸ ಶಿಲಾಯುಗೊಕು ಸಮ್ಮಂದಿ ಸಯಿನ(ಅವಶೇಷ) ಅರಿಗಿರಿದ್ನ ತಿಕ್ಕುದು ಕುವೆಂಪು ಇಸ್ವ ಇದ್ಯಾಲ್ಯೊದ "ಇತಿಹಾಸ ಬೊಕ್ಕ ಪ್ರಾಕ್ತನ ಶಾಸ್ತ್ರ ವಿಭಾಗ"ದ ಕಲ್ಪಾರ್ತಿಲಾಯಿನ ಶ್ರುತೇಶ್ ಆಚಾರ್ಯ ಬೊಕ್ಕ ಸುಭಾಸ್ ತನ್ನ ಕ್ಷೇತ್ರ ಕಜ್ಜೊದ ಸಂದರ್ಬೊಡು ಬೆರ್ಮೆರೆ ಮೂರ್ತಿನ್ ಪತ್ತೆ ಮಲ್ದೆರ್ [ಉದಯವಾಣಿ -ಅಗೋಸ್ತು15 - ಪುಟ 12] ಕೈಟ್ ಕೈಮಡು, ಕಂಚಿದ ಪ್ರತಿಮೆ ಬೊಕ್ಕ ಬೊಣ್ಯ ಕೆಂಪು ಬಣ್ಣದ ಕರತ ಚೂರು ತಿಕುದ್ ಸುರುತ ಶಿಲಾಯುಗೊಕು ಸೇರ್ನ ಪ್ರತಿಮೆಂದ್ [ಕೈಮಡು ದೊರ ಗಿತ್ತುದ್ 7 ಸೆಂ.ಮೀ. ಅಗೆಲ, 14 ಸೆಂ.ಮೀ ಉದ್ದ] ಪ್ರಾಚ್ಯ ಸಂಶೋಧಕೆರಾಯಿನ ಯಸ್. ಎಂ. ಕೃಷ್ಣಯ್ಯೆರ್ ತೆರಿಪಾದೆರ್. ಲಿಂಗ ರೂಪದ ಕಲ್ಲುನ್, ಬೆರ್ಮೆರ ಗುಂಡ, ಕಂಚಿದ ಪ್ರತಿಮೆ ಜೈನ ನಾಗಬೆರ್ಮೆರ್, ಕಲ್ಲುದ ಮಿತ್ತ್ ಉಪ್ಪುನ ಕೆತ್ತನೆನ್ "ಮೂಲ ಪುರುಷ" ಪಂದ್ ಆರ್ ಗುರ್ತಿಸದೆರ್. ಲೋಹ ಶಿಲ್ಪದ ಕಾಲೊನಾರ್ ಗುರ್ತಪತ್ತೊಡಾತೆ. ಅಂಚಾದ್ ಬೆರ್ಮೆರೆ ಪುರಪು ಪೊಸ ಶಿಲಾಯುಗದಾತ್ ಪರತುಂದ್ ತೆರಿದ್ ಬರ್ಪುಂಡು. ಅಂಚನೇ ಬೆಮ್ಮೆರೆ ಮೂರ್ತಿದ ಎಡತ ಕೈಟ್ ಅಡ್ಡಣ, ಬಲತ ಕೈಟ್ ಕಡ್ಸಲೆ ಉಪ್ಪುಂಡು. ಬೆರ್ಮೆರ್ ಬೂತ ಅತ್ತ್. ಸಿರಿ, ಕೋಟಿ ಚೆನ್ನಯೆರೆ, ಬಬ್ಬು ಬಾರಗನ ಸಂದಿಲೆಡ್ ಬೆರ್ಮೆರೆ ಉಲ್ಲೇಖ ಬರ್ಪುಂಡು. ದೈವ ಬೂತೊಲೆಗ್ ಗುರಿಕಾರೆ ಬೆರ್ಮೆರ್. ನಿಜವಾದ್ ತೂಂಡ ಬೆರ್ಮೆರೆಗ್ ಕೋಲ ನೇಮ ಇಜ್ಜಿ. ಬೆರ್ಮೆರೆ ಒಟ್ಟುಗು ನಾಗನ್ ಸೇರಾದ್ ನಾಗಬೆರ್ಮೆರೆಗ್ ಕೋಲ ನಡಪುಂಡು. ಇನಿ ಗುಂಡ, ಆಲಡೆ, ತಾನೊಲೆಡ್ ಬೆರ್ಮೆರೆಗ್ ಆರಾಧನೆ ಉಂಡು. ಬ್ರಹ್ಮದ ತದ್ಭವ ರೂಪ ಬೆರ್ಮ ಅತ್ತ್, ಬೊಮ್ಮ ಆಪುನಿ. ಅಂಚಾದ್ ತುಳುನಾಡ ಬೆರ್ಮೆರೆನ್ ಬ್ರಹ್ಮನ್ದ್ ಪನೆರೆ ಸಾಧ್ಯ ಇಜ್ಜಿ. ಲೆಕ್ಕೆಸಿರಿ ಬೊಕ್ಕ ಬೆರ್ಮೆರ್ ಒಟ್ಟುಗುಪ್ಪುವೆರ್. ಬೆರ್ಮೆರ್ಲೆಕ್ಕನೆ ತುಳುನಾಡ ದೈವೊಲು ದೇವಯೋನಿಡ್ ಪುಟ್ಟಿನವತ್ತ್. ಅಂಚಾದ್ ಬೆರ್ಮೆರೆಗ್, ದೈವೊಲೆಗ್ ಪುರಾಣೊನು ಗೋಡ್ಯಾಯರೆ ಬಲ್ಲಿ. ತುಳುವ ಮಣ್ಣುಡೇ ಪುಟುದು ತುಳುವೆರೆಡ ಆರಾಧನೆ ದೆತೊನುನ ದೈವೊಲು ತುಳುನಾಡ ಶಕ್ತಿಲುಂದು ನೆಗತ್ ತೋಜುಂಡು. ಬಿರುವೆರ್ ಬೆರ್ಮೆರೆ ಆರಾಧಕೆರುಂದ್ ತೆರಿಯರೆ ಗರಡಿಲೆಡ್ ಕೋಟಿ ಚೆನ್ನಯೆರೆ ನಡುಟುನ್ತುದು ನಮನ್ ಮಾತೆರೆನ್ಲಾ ಕಾಪುನ ಬಿರ್ಮೆರೇ ಸಾಕ್ಷಿ. ಬನೊಟಿಪ್ಪಿ ಬೆರ್ಮೆರ್, ಪುಂಚೊಡಿಪ್ಪಿ ನಾಗೆ, ನೀರಿಡಿಪ್ಪಿ ಲೆಕ್ಕೆಸಿರಿ ಉಂದು ಪೂರಾ ದುಂಬುದ ಕಾಲೊಡು ಬನತ ಶಕ್ತಿಲಾದ್ ಬೆರ್ಮೆರೆ ಗುಂಡಿ, ಲೆಕ್ಕೆಸಿರಿ ಗುಂಡಿನ್ದ್ ಇತ್ತುಂಡು. ಬೆರ್ಮೆರೆ ಗುಂಡಿಗ್ ಮೀನುಗ್ ಕಡುಪಾಡರೆ ಪೋದು ಮಾಯಕಾದ್ ದೈವೊಲಾಯಿನ ವೀರ ಪುರುಷೆರ್ ತುಳುನಾಡುಡುಲ್ಲೆರ್. ಲೆಕ್ಕೆಸಿರಿ ಗುಂಡಿಗ್ ಪೋಯಿನಕುಲು ನಿಲೆ ತಿಕ್ಕಂದೆ ಮಾಯಕಾತಿನ ಕತೆಲಾ ತುಳುನಾಡುಡ್ ತೂವರೆ ತಿಕ್ಕುಂಡು. ಇನಿಕಾನಗ ಲೆಕ್ಕೆಸಿರಿಗ್ ಮಾಡ ಆಂಡ್. ಲೆಕ್ಕೆಸಿರಿನ್ ಆ ಪುದರುಡು ಲೆಪ್ಪಂದೆ ಬೆರ್ಮೆರೆನ್ ಉಳ್ಳಾಯೆಂದ್ , ಲೆಕ್ಕೆಸಿರಿನ್ ಉಲ್ಲಾಲ್ದಿಂದೇ ಲೆತ್ತೊಂದಿತ್ತಿನಿ. ಅಂಚಿನ ಲೆಕ್ಕೆಸಿರಿ ಇನಿ ಪುರಾಣದ ರಕ್ತೇಶ್ವರಿಯಾಂಡ್, ಬೆರ್ಮೆರ್ ಬ್ರಹ್ಮ ಆಯೆರ್, ಉಲ್ಲಾಲ್ದಿ ದುರ್ಗಾಪರಮೇಶ್ವರಿ ದೇವಿಯಾಂಡ್. ನಾಗಗ್ ಕಟ್ಟೆ ಆಂಡ್. ನಾಗನ ಮಣ್ಣ್ ಮುಟ್ಟುನ ಪುಂಚ ಮಾಯಕಾದ್ ನಾಗೆ ಸಾದಿಗ್ ಬೂರುಲೆಕಾದ್ ಬನೊಕ್ಲು ಪೂರ ನಿರ್ಸಂತಾನ ಆದ್ ಪೋಂಡು. ಬೆರ್ಮೆರೆಗ್ ಗುಂಡ ಆಂಡ್. ಬೆರ್ಮೆರೆನ ಪುದರ್ ಚತುರ್ಮುಖ ಬ್ರಹ್ಮ ಆಂಡ್. ಆಲಡೆ, ಗರಡಿ ಕಳಟ್ ಇನಿಲ ಮೂಲ ಬೆರ್ಮೆರೆ ಆರಾಧನೆ ಒರಿದುಂಡು. ಲೆಕ್ಕೆಸಿರಿಗ್ ಮೂಜಿಲ್ನಾಯ ದೈವಂದ್ಲ ಪನ್ಪೆರ್. ಬೆರ್ಮೆರೆ ಸಾನ ಪೋದು ಇನಿ ಬ್ರಹ್ಮಸ್ಥಾನ ಆದ್ ಪೋಂಡು. ಚತುರ್ಮುಖ, ಕಪಾಲ ಬ್ರಹ್ಮಗ್ ಪೂಜೆ ಇಜ್ಜಂದಿನೆಡ್ಡಾತ್ರ ಬೆಮ್ಮೆರೆನ್/ಬೆರ್ಮೆರೆನ್ ಬ್ರಹ್ಮ ಮಲ್ತುದ್ ಬೆರ್ಮೆರೆ ಸಾನ ಮಾಡೊಲೆಗ್ ಬ್ರಹ್ಮಸ್ಥಾನ ಮಲ್ತೆರ್. ಇನಿ ದೈವಸಾನೊಲೆಡ್(ಉಲ್ಲಾಲ್ದಿನ) ಬ್ರಹ್ಮ ರಕ್ಕಸಗ್ಲಾ ಗುಂಡ ಕಟ್ಟುದ್ ಆರಾಧನೆ ನಡಪುಂಡು. ಉಲ್ಲಾಲ್ದಿ ಸಾನೊಲು ಎಚ್ಚಾದ್ ಪರಪುನ ನೀರ ಜಾಗೆದ ಕೈತಲ್ ಉಪ್ಪುಂಡು. ಅಂಚಾದ್ ಲೆಕ್ಕೆಸಿರಿ ಉಲ್ಲಾಲ್ದಿನ್ದ್ ಪಂಡ ತಪ್ಪಾವಂದ್. ಉಲ್ಲಾಲ್ದಿನ ಸಾನ, ಮಾಡದ ಬರಿಟ್ ನಾಗನ ಪ್ರಾಕೃತಿಕ ಬನ ಉಪ್ಪುಂಡು. ಅಂಚಾದ್ ಉಲ್ಲಾಲ್ದಿ ಇತ್ತಿ ಜಾಗೆಡ್ ಬೆರ್ಮೆರ್ ಒಂಜಿ ಕಾಲೊಡು ಇತ್ತುದುಪ್ಪೆರ್. ಅವ್ವೇ ದುಂಬುಗು ರೂಪಾಂತರ ಆದ್ ಬೆರ್ಮೆರೆನ್ ಮೂಲೆ ಸೇರಾದ್ ಬ್ರಹ್ಮರಕ್ಕಸ ಗುಡಿ ಆದುಪ್ಪೆರ್ಲಾ ಸಾಧ್ಯತೆ ಉಂಡು. ಪುಟ್ಟು ಸಾವಿಜ್ಜಂದಿ ಬೆರ್ಮೆರೆ ಜಾಗೆಡ್ ಅಕಲ್ತಪ್ಪುಡು ಕರಿದ್ ಪೋಯಿನ ವ್ಯಕ್ತಿನ ಗುಡಿ ಎಂಚ ಬತ್ತುಂಡುಂದು ತೆರಿಯಂದೆ ಪೋಂಡು.

ಬೆರ್ಮೆರ್

ಚಿತ್ರ ಕೃಪೆ: ಅನೂಪ್ ಸೂರಿಂಜೆ

ಬೆರ್ಮೆರೆನ್ ತೂನಗ ಬೆರ್ಮೆರ್, ಜಯವುಲ್ಲ ಬೆರ್ಮೆರ್, ಉರಿ ಬೆರ್ಮೆರ್, ಅರಿ ಬೆರ್ಮೆರ್ ಇಂಚ ಬೇತೆ ಬೇತೆ ಪುದರುಡು ಲೆಪ್ಪುವೆರ್. ಬನ ಇತ್ತಿನವ್ಲು ನೀರ ಸೆಲೆ, ತೋಡು ಉಪ್ಪುಂಡು. ಬನ ಇತ್ತಿನವ್ಲು ಬೆರ್ಮೆರ್, ನಾಗೆ, ಲೆಕ್ಕೆಸಿರಿ ಇತ್ತುಂಡ ಲೆಕ್ಕೆಸಿರಿ ಗುಂಡಿ, ಬೆರ್ಮೆರೆ ಗುಂಡಿ ಬನತ ಕೈತಲೇ ಉಪ್ಪುಂಡು. ಎಚ್ಚಾದ್ ಸುಳಿತ ಗುಂಡಿಲು ಅವ್ವಾದಿಪ್ಪುವ. ಬೆಮ್ಮೆರೆ ಪುದರುಡ್ ಬಂಟಾಲ ತಾಲೂಕುಡು ಒಂಜಿ ಜಾಗೆ ಉಂಡು. "ಬೆಮ್ಮೆರೆ ಕೂಟೇಲ್" ಪಂದ್. ಒಂಜಿ ಮಲ್ಲ ಸುದೆಕ್ ಎಲ್ಯ ಕೈತೋಡು ಸೇರುನೆಕ್, ರಡ್ಡ್ ಎಲ್ಯ ಎಲ್ಯ ಸುದೆಕುಲು ಒಟ್ಟು ಸೇರುನೆಕ್ ತುಳುಟು "ಕೂಟೇಲ್" ಪನ್ಪ. ಕನ್ನಡೊಡು ಕೂಡಲ ಸಂಗಮ ಪನ್ಪೆರ್. ಇಂಚಿ ಮಲ್ಲ ಸುದೆ, ಎಲ್ಯ ಕೈ ತೋಡು ಸೇರುನ ಜಾಗೆದ ಬೆಮ್ಮೆರೆ ಕೂಟೇಲ್ ಇನಿ "ಬ್ರಹ್ಮರ ಕೂಟ್ಲು" ಆದ್ ಪೋತುಂಡ್. ಉಂದು ನಂಕ್ ಅಗತ್ಯ ಇಜ್ಜಾನ್ಡ್. ದಾಯೆ ಪಂಡ ಪ್ರಧಾನವಾದ್ ಬೆರ್ಮೆರೆ ಆರಾಧನೆ ನೆಗತ್ ತೋಜುನಿ ತುಳುನಾಡುಡ್. ಕನ್ನಡದ ಪುದರ್ ಆ ಮೂಲಕ "ಬೆರ್ಮ" ಪೋದು "ಬ್ರಹ್ಮ" ಮಲ್ಪುನ ಅನಿವಾರ್ಯತೆ ಇಜ್ಜಾನ್ಡ್. ಅಂಚನೇ ಇನಿ ನಮ್ಮ ತುಳುನಾಡ ಅವ್ವೇತೋ ಊರುದ ಪುದರ್ ಕನ್ನಡ ಆದ್ ನನಲಾ ದುಂಬು ಪೋದು ಪರಂಗಿಸೌಧ ಆಯ್ನೆಕೊಂಜಿ ಉದಾರ್ಮೆ ತೂಲೆ. ಪೂಪಾಡಿಕಲ್ಲ್ ಪೋದು ಹೂಹಾಕುವ ಕಲ್ಲಾದ್ ಇತ್ತೆ ಹೆಚ್ ಕಲ್ಲ್ ಆತುಂಡು. ಪೂಪಾಡಿಕಲ್ಲುದ ಊರು ಪಂಡ ಇತ್ತೆ ಏರೆಗ್ಲಾ ಇನಿ ತೆರಿಯಂದಿಲೆಕಾಂಡ್. ದುಂಬು ತುಳುವೆರ್ ನಂಬಿನಿ ಸರಿಸೃಪೊಲೆನ್. ಅರಣೆ ಇಸತ ತುಂಡಾದಿತ್ತುಂಡು. ದುಂಬು ಬಿರ್ಮೆರೆ ಕಲ್ಲುನ್ "ಅರಣೆ ಕಲ್ಲು" ಪಂದ್ ಪನೊಂತೆರ್. ಬನೊಟು ಬೆರ್ಮೆರೆ ಕಲ್ಲುಗ್ ಅರಣೆ ಕಲ್ಲುಂದು, ಲೆಕ್ಕೆಸಿರಿನ ಕಲ್ಲುಗ್ "ಮುದಲೆ ಕಲ್ಲುಂದ್", ಜಿಡೆ ದೆರ್ಪಿ ಉಚ್ಚುಗು ನಾಗೆಂದ್ ಪುದರಿತ್ತುಂಡು. ಅರಣೆ ಮೂಲದ ಬಿರ್ಮೆರ್, ಮುದಲೆ ಮೂಲದ ಲೆಕ್ಕೆಸಿರಿ(ಲೆಕ್ಕೆಸಿರಿನ ಗುಂಡಿಗ್ ಪೊಯಿನಾಯೆ ಪಿರ ಬೈಜೆಗೆ, ಬೂಮಿ ತೂಕದ ದೈವಗೆ), ಪೊರ್ಲ ಜಡೆ ಅರ್ಲಾದ್ ಇಸ ಕಕ್ಕುನ ನಾಗೆ ಇಂಚಿ ಪ್ರಕೃತಿದ ಇಚಿತ್ರೊಲೆನ್ ಗೆಂದರಾವಂದೆ ನರಮಾನಿ ಅವೆಟ ರಾಜಿ ಮಲ್ತೊನ್ದು ನಂಬರೆ ಸುರು ಮಲ್ತೆ. ನಮ್ಮ ತುಳುವೆರೆಗ್ ತೆರಿಯಂದಿಲೆಕ ಬೆರ್ಮೆರೆ ಚರಿತ್ರೆ ನಾಶ ಮಲ್ಪುನ ಕೆಲಸ ದುಂಬುಡ್ದೇ ನಡತೊಂದುಂಡು. ಇನಿ ದೈವಾರಾಧನೆಗ್ಲಾ ಅಂಚನೆ ಪುರಾಣ ಸೇರಾದ್ ನಾಶ ಮಲ್ತೊಂದುಲ್ಲೆರ್. ಉಲ್ಲಾಲ್ದಿ ದೈವೊನು ದೈವ ಆದ್ ಕಟ್ಟ್ ಕಟ್ಲೆ ಮಾತ್ರ ಮಲ್ತುದ್ ಉಲ್ಲಾಲ್ದಿನ್ ದುರ್ಗಾಪರಮೇಶ್ವರಿ ಮಲ್ತುದ್ ದೈವದ ಮುಗೊನು ಮರತ ಬೊಂಬೆಗ್ ದೀದ್, ಕೆಲವು ತಿಕುಡ್ ಇರ್ವೆರ್ ಉಳ್ಳಾಲ್ದಿನಕ್ಲೆನ ನಡುಟು ಶ್ರೀ ಚಕ್ರ ದೀದ್ ನವರಾತ್ರೆ ಪೂಜೆ, ಕುಂಕುಮಾರ್ಚನೆ ಮಲ್ತುದ್, ಭಜನೆ, ಪೂಜೆ ಮಲ್ತೊಂದುಲ್ಲೆರ್. ನನಾಂಡಲಾ ತುಳುವೆರೆಗ್ ನಿದ್ರೆ ಬುಡ್ಜಿಂಡ, ಬೆಮ್ಮೆರೆಗಾಯಿನ ಅವಸ್ತೆನೇ, ನಾಗಗ್ ಆಯಿ ಅವಸ್ತೆನೇ ದೈವೊಲೆಗಾವು. ಇತ್ತೆನೇ ಎಚ್ಚಿನ ದೈವೊಲು ದೇವೆರಾದ್ ಅಡೆಗ್ ಬಂಡಿದ ಬದಲ್ ತೇರ್ ಬೈದುಂಡು. ಕೊಡಿಮರ ಪಾಡೆರಾವಂದಿ ದೈವದ ಕಲೊಕು ಕೊಡಿಮರ ಬೈದುಂಡು. ದೈವೊಲೆನ ಮೂಲ ಪುದರ್ ಪೂರ ಪುರಾಣದ ದೇವೆರೆ ಪುದರಾದ್ ಪೋತುಂಡ್. ಪ್ರಕೃತಿ ಆರಾಧನೆದ ದೈವೊಲಿನಿ ದೇವೆರಾದ್ ಕಟ್ಟುನಕುಲ್ಲಾ ದೈವೊಗು ಪಡಿಯರಿ ಪತ್ತುದ್ ಯಾನ್ ದೇವಿ, ಯಾನ್ ದುರ್ಗೆನ್ದ್ ಪಂಡೊಂದುಲ್ಲೆರ್ ಪಂಡ ದೈವಾರಾಧನೆದ ಪರಿಸ್ಥಿತಿ ಓಡೆಗ್ ಎತ್ತುಂಡುಂದ್ ತರೆಟ್ ಬೊಂಡು ಇತ್ತಿನಕ್ಲೆಗ್ ಅರ್ಥ ಆವು. ಇನಿ ಬನೊಕ್ಲೆಡ್ ನಾಗನೊಟ್ಟುಗು ಲೆಕ್ಕೇಸಿರಿನ ಆರಾಧನೆಲಾ ದೇವ ಕಿರಿಯೆಡ್ ನಡತೊಂದುಂಡು. ನಾಗನ ಕಲ್ಲುಗು ನೂಲು ಪಾಡುದ್, ಮಂತ್ರ ಪಂಡುದ್ ಅವೆತ ಆಹಾರ ಸಂಸ್ಕೃತಿಗ್ ವಿರುದ್ದವಾಯಿನ ಆವಾರ ಸಂಸ್ಕೃತಿನ್ ಕನತುದ್ ಆರಾಧನೆ ಮಲ್ತೊಂದುಲ್ಲೆರ್. ತುಳುನಾಡುಡ್ ಪುರಾಣದ ಇನಕನ್ , ಗಣಪತಿ ದೀಪು ನೆಡ್ಡ ದುಂಬೇ "ಸುತ್ಯೆ" ದೀಪುನ ಕಿರಮ ಇತ್ತುಂಡ್. ಅವು ಬೆರ್ಮೆರೆಗ್ ದೀಪುನ ಸುತ್ತೆ. ಇನಿಲ ದೈವ ಪನ್ನಗ, ಮದ್ಯಸ್ತೆರ್ ಪನ್ನಗ "ದೀಸುತ್ತೆಡಾವೊಡುಂದು" ಪನ್ಪೆರ್. ತುಳುವೆರ್ ಸುತ್ತಿಗೆ ದೀನಗ ಬೊಳಂತರಿ ಗಳಸೊಂದಿಜ್ಜಾನ್ಡ್. ತುಳುನಾಡ ಮೂಲ ಜನಾಂಗದ ಒಂಜಿ ಆರಾಧನೆಡ್ ಸತ್ಯ ಸಾರಮಾನಿಲೆಗ್ (ಕಾನದ - ಕಟದ) ಬಜಿಲ್, ಬಾಜೆಲ್ ದೀನಗ, ಬೆಮ್ಮೆರೆಗ್ ಸುರುಕು ಕೈ ಮುಗಿದ್ ಉದಿಪು ತುಡರ್ ಅರ್ಲವುನ ಕಿರಮ ದುಂಬಿತ್ತುಂಡು. ಆಂಡ ಇನಿ ಆ ತುಡರ್ ದೀಪುನೆನ್ ಗಣಪತಿಗ್ ಸುತ್ತೆ ದೀಪುನಿಂದ್ ಪನ್ಪೆರ್. ಉರ್ಪೆಲರಿಟ್ ಬೆರ್ಮೆರೆಗ್ ಸುತ್ತಿಗೆ/ಸುತ್ಯೆ ದೀವೊಂತಿನ ಕಾಲಾನುಭಾಗೊಡು ತುಳುವೆರೆಗ್ ಪುರಾಣೊಡು ಮೋಕೆ ಪುಟ್ಟುದು, ಮುಲ್ತ ಕಟ್ಲೆ ಕಡಿದ್, ಪೊಸತೊಂಜಿ ಕಟ್ಲೆನ್ ಒತ್ತೊಂದು ಗಣಪತಿಗ್ ಬೊಳಂತರಿತ ಸುತ್ಯೆ ದೀಯೆರೆ ಸುರು ಮಲ್ತೆರ್. ಅವೆನ್ ಗಣಪತಿ ದೀಪುನಿಂದ್ ಲೆತ್ತೆರ್. ದೈವೊಲೆಗ್ ಇನಿಕ್ಲಾ ಬಾರ್, ಅವೆತ ಮಿತ್ತ್ ಕೊಡಿ ಇರೆ ಪಾಡುದ್ ಉರ್ಪೆಲರಿಯೇ ದೀಪುನಿ. ತುಳುವೆರ್ನ ಸುರುತ ನುಪ್ಪುದ ಬಟ್ಟಲ್ ಪಂಡ "ತಡ್ಪೆ". ತಡ್ಪೆ ಪಂಡ ಉನ್ಪುನ ಬಟ್ಟಲತ್ತ್, ಅರಿ ಪೊಡೆಪುನವು. ತಡ್ಪೆನ್ ದೊಂಕೆರೆ ಬಲ್ಲಿ, ತಡ್ಪೆನ್ ದಂಟೆರೆ ಬಲ್ಲಿ, ತಡ್ಪೆನ್ ದಾಂಟರೆ ಬಲ್ಲಿ, ತಡ್ಪೆಗ್ ಮೈಸೂಡಿ ತಾಗಾಯೆರೆ ಬಲ್ಲಿ, ಸೂಟು ಪೊತ್ತಾಯೆರೆ ಬಲ್ಲಿ. ದುಂಬುದ ಎರಿಯಾಕ್ಲು ಕಂಬೆರ್ಲೆಗ್ ಸುತ್ತಿಗೆ ದೀನಗ, ಗ್ರಾಮದ ದೈವೊಲೆಗ್, ಇನಕ ದೇವೆರೆಗ್ ಕೈ ಮುಗಿಯೊಂತೆರ್. ಆಂಡ ಬೆರ್ಮೆರೆಗೇ ಉರ್ಪೆಲರಿತ ಸುತ್ತೆ ದೀವೊಂತೆರ್. ಇನಿ ಪೂರಾ ತುಳುನಾಡ ವೀರ ಪುರುಷೆರೆಗ್ ದೇವೆರೆ ಪುರಾಣ ಕಟ್ಟಿನ ದೈವದ ಚಾಕಿರಿ ಮಲ್ಪುನಕುಲು ಮಾತ್ರ ಬೆರ್ಮೆರೆನ್ ಬುಡುದು ಗಣಪತಿಗ್ ಬೊಳಂತರಿದ ಸುತ್ತೆ ದೀಪೆರ್. ದೇವೆರೆ ಸಾನೊಡಾಂಡ ಪೆನೆರಿಜ್ಜಿ, ಆಂಡ ದೈವದ ಪೂರ ಕಟ್ಲೆಡ್ ಬೆಮ್ಮೆರೆಗೇ ಸುತ್ಯೆ ದೀವೊಂತಿನಿ. ದೈವೊದ ನಂಬೊಳಿಗೆದ ಕಲ್ಲುದ ಮಿತ್ತ್ ಉರ್ಪೆಲರಿ ಸುತ್ಯೆ ದೀನ್ಡ ಅವು ದೈವೊಲೆಗೇ ಸಂದುನಿ ಪಂಡ ದೈವೊಲೆನ್ ತುಳುನಾಡುಗ್ ಕನತಿ ಬೆರ್ಮೆರೆಗೇ ಸಂದಿಗ ಆಪುನಿ. ದೈವೊಲೆಗುಂದ್ ತುಡರ್ ಅರ್ಲಾನಗಲ ತಾರಯಿದ ಎಣ್ಣೆನೇ ಗಳಸೊಡು. ಕಮ್ಮಿಡಾಪುಂಡುಂದು ಎಣ್ಮೆದ ಎಣ್ಣೆನ್ ತುಡರ್ ಅರ್ಲಾಯರೆ ದುಂಬುದಕ್ಲು ದೈವದ ಕಲೊಟು ಗಳಸೊಂದಿಜ್ಜಾನ್ಡ್. ಇನಿ ನಾಗನೇ ಬೆರ್ಮೆರುಂದು ಪನೆರೆ ಸುರು ಮಲ್ತುದ್ ತುಳುನಾಡ ಮೂಲ ಬೆಮ್ಮೆರೆನ್ ನಮ ಮೂಲೆ ಸೇರ್ಸಾದ.

ಸುಮಾರು 1600 ವರ್ಸದ ಪಿರವು ಮೌರ್ಯ ಅರಸುಲ್ನ ಕಾಲೊಡು ವೈದಿಕತೆ ತುಳುನಾಡುಗ್ ಬರ್ಪುನ ದುಂಬೇ ತುಳುವೆರ್ ಬೆರ್ಮೆರೆ ಆರಾಧನೆ ಮಲ್ತೊಂತೆರ್. ಮಿತ್ತ್ ಸೂರಿಯ ನಾರಾಯಿಣ ದೇಬೆರೆ, ತಿರ್ತ್ ಬೂಮಿಡ್ ಬೆರ್ಮೆರ್ ದೈವೊಲೆನ್ ನಂಬುನ ಬುಡುಂಡ ಅಪಗ ದೇವೆರ್ನಕುಲು ತುಳುನಾಡುಡ್ ಇಜ್ಜಾನ್ಡ್. ವೈದಿಕ ದೇವೆರೆನ್ ಒತ್ತೊನ್ನ ತುಳುವೆರೆಗ್ ಬೆರ್ಮೆರೆ ಸಮ್ಮಂದ ದೂರಾವೊಂದು ಪೋನಗ ಬೆರ್ಮೆರೆ ಸೃಷ್ಟಿದ ತುಳುನಾಡ್ ವೈದಿಕ ಪರಶುರಾಮ ಸೃಷ್ಟಿದ ತುಳುನಾಡಾದ್ ಬದಲಾಂಡ್. ಮೂಜಿ ಸಾರ ವರ್ಸ ಪಿರಾಕುದ ಪರಶುರಾಮ ಅವತಾರರ್ದ್ ನಾಲ್ ಸಾರ ವರ್ಸ ದುಂಬುದ ತುಳು ಬಾಸೆ ಇಪ್ಪುನಗ ಆ ಸೃಷ್ಠಿಗ್ ಬಿಲೆ ತಿಕ್ಕುಜಿ. ಪ್ರಾಚ್ಯ ಸಂಶೋಧನಾ ಇಲಾಖೆದಕುಲು ಅಫಘಾನಿಸ್ತಾನದ, ಬಲೂಚಿಸ್ತಾನದ "ಪಿರಾಕ್" ಪನ್ಪಿ ಜಾಗೆಡ್ ಗರ್ಪುನಗ ಕ್ರಿ. ಪೂ. 1700 ತ ಪಿರವುದ ಕುದುರೆದ ಮಿತ್ತ್ ಕುಲ್ದಿನ ಬೆರ್ಮೆರೆ ಮೂರ್ತಿ ತಿಕುದುಂಡು. ಆಯನ್ ದ್ರಾವಿಡ ಸಂಸ್ಕೃತಿದ ಸೃಷ್ಟಿಕರ್ತೆನ್ದುಲಾ ಪನ್ಪೆರ್. ಪುರಾಣದ ಬ್ರಹ್ಮ, ವಿಷ್ಣು, ಮಹೇಶ್ವರನ ಕತೆ ಬತ್ತಿ ಬೊಕ್ಕ ಆದಿ ದೈವ ಬೆರ್ಮೆರ್ ಪುರಾಣೀಕರಣದ ಚತುರ್ಮುಖ ಬ್ರಹ್ಮ ಆದ್ ಪೋಯೆರ್. ಈ ಬದಲಾವಣೆಗ್ ನಾಲ್ ಸಾರ ವರ್ಸ ಕಾಲ ಬೋಡಾಂಡ್. ದ್ರಾವಿಡೆರ್ ದಕ್ಷಿಣ ಭಾರತೊಡು ಮಾತ್ರ ಉಪ್ಪುನಿಂದ್ ಪನ್ಪುನವು ತಪ್ಪು. ದ್ರಾವಿಡ ಮೂಲೊರ್ದ್ ಬತ್ತಿನ "ಬ್ರಾಹೂಯಿ" ಬಾಸೆ ಪಾತೆರುನ ಜನ ಇನಿಲಾ ಪಾಕಿಸ್ತಾನದ ಒಂಜಿ ಬಾಗೊಡುಲ್ಲೆರ್. ಬಲೂಚಿಸ್ತಾನದ "ಪಿರಾಕು"ಡ್ದ್ ಪಿದಡ್ನ ಬುಡಕಟ್ಟು ಜನಾಂಗ ಮದ್ಯ ಭಾರತೊಡು ಬತ್ತುದ್ ಅಲ್ತ್ ಬಂಗಾಲೊಗು ಪೋದು ಅಲ್ತ್ ಆಂಧ್ರ ದಾಂಟುದು ಭಾರತದ ಪಡ್ಡೆಯಿ ಕರಾವಳಿಡ್ ಬತ್ತುದ್ ನಿಲೆ ಆಯೆರ್. ಅಕುಲು ಬನ್ನಗ ತನ್ನ ಬಾಸೆ ಬೊಕ್ಕ ತನ್ನ ಸಂಸ್ಕೃತಿನ್ ತನ್ನ ಒಟ್ಟುಗು ಕನದೆರ್ ಪನ್ಪಿ ವಾದಲಾ ಉಂಡು. ತುಳುನಾಡುಗ್ ಶೈವ ಧರ್ಮದ ಪ್ರಭಾವ ಬನ್ನಗ ತುಳುವೆರ್ ಬೆರ್ಮೆರೆ ಬದಲಾದ್ ಶಿವನ್ ಆರಾಧನೆ ಮಲ್ಪೆರೆ ಸುರು ಮಲ್ತೆರ್. ತುಳುನಾಡುಡ್ ಕ್ರಿ. ಶ. ಸುರಾನಗನೇ ಲಿಂಗ ರೂಪದ ಈಸರನ ಆರಾಧನೆ ಇತ್ತುಂಡ್. ಕೆಲವು ಬಿರ್ಮೆರೆ ಮೂರ್ತಿದ ಕೈಟ್ ತ್ರಿಶೂಲ, ಕೆಬಿಟ್ ಕುಂಡಲ ಇತ್ತಿನ ಮೂರ್ತಿಲೆನ್ ತೂದು ಬೆರ್ಮೆರೆನ್ ಶಿವನ ಪರಿವಾರಂದುಲ ಪನ್ಪೆರ್. ಕೆಲ ಬೆರ್ಮೆರೆ ಮೂರ್ತಿದ ಒಂಜಿ ಕೈಟ್ ಜಲ ಪಾತ್ರೆ ಕುಡೊಂಜಿ ಕೈಟ್ ಅಡ್ಡಣ ಇತ್ತುದ್ ಇಂಚಿನ ಬೆರ್ಮೆರೆನ್ ಯಕ್ಷ ಬ್ರಹ್ಮಾಂದುಲಾ ಪನ್ಪುನಕುಲುಂಡು.

ಬಿರ್ಮೆರೆನ್ ಶಾಸ್ತಾರೆಂದ್ ಪಂಡುದು ಆರಾಧನೆ ಮಲ್ಪುವೆರ್. ಗುಡ್ಡೆದ ಮಿತ್ತ್ ಪಿಲಿತ್ತ ಮಿತ್ತ್ ಕುಲ್ನ ದೈವನೇ ಶಾಸ್ತಾರಂದ್ ಪನ್ಪೆರ್. ಕಳಶ ಚಾವಡಿಡ್ ಕೊಡಮಂದಾಯನ್ ಶಾಸ್ತಾರ ಪಂಡ ಶಬರಿಮಲೆಟ್ ಬುಡಕಟ್ಟು ಜನಾಂಗದ ನಾಯಕೆ ಅಯ್ಯಪ್ಪೆ ಕಟ್ಟಾಯಿ ಸಾನಲ "ಧರ್ಮಶಾಸ್ತ" ನ ಸಾನ. ಶಾಸ್ತಾರನ್ ನಮ ವನಶಾಸ್ತಾರಾಂದುಲಾ ಪನ್ಪ. ಅಯ್ಯಪ್ಪನ್, ಶಾಸ್ತಾನ್ ಬೂತಗಣನಾಯಕೆಂದುಲಾ ಪನ್ಪ. ಈ ಶಾಸ್ತಾರ ಕಲ್ಪನೆ ತೂನಗ ಮೂಲ ಬೇರ್ಮೆರುಂದ್ ತೋಜಿದು ಬರ್ಪುಂಡು. ಬೆರ್ಮೆರ್ ಕಾಶಿಡ್ ಪೋನಗ ಕಾಲಭೈರವೆ, ಆಫ್ರಿಕಾ ಈಜಿಪ್ಟ್ ಡ್ ಫೆರೋ ದೇವತೆ. ಉಂದೆನ್ ತೂನಗ ಬೆರ್ಮೆರೆ ಸಂದಿಡ್ ಬರ್ಪುನ 7 ಕಡಲ್ ನಮ್ಮ ಕಣ್ಣೆದುರು ಬರ್ಪುಂಡು. ಬೆರ್ಮೆರೆ ಒಟ್ಟುಗು ಉಪ್ಪುನ ಉಲ್ಲಾಲ್ದಿ ಲೆಕ್ಕೆಸಿರಿನ ಸಂದಿಡ್ ಸುಮಾರ್ ಅರ್ದದಾತ್ ಬಿರ್ಮೆರೆ ಸಂದಿಯೇ ಉಪ್ಪುಂಡು. ಆ ಬೆರ್ಮೆರೆ ಸಂದಿ ಸುರಾಪುನಿ "ಕಂಚಿ ದೇಸೊಡು ಪುಟ್ನ ಕುಮಾರಂದ್". ಮೂಲು ಕಂಚಿ ಪಂಡ ಆಂಧ್ರ ಪ್ರದೇಶದ ಒಂಜಿ ಜಾಗೆ. ಉಂದೆನ್ ತೂನಗ ಬೆರ್ಮೆರ್ ವಿಶ್ವವ್ಯಾಪಿ ಪನ್ಪಿ ಸತ್ಯ ನಮ್ಮ ಕಣ್ಣೆದುರು ಬರ್ಪುಂಡು. ಜಿಡೆತಾರ್ ಬೆರ್ಮೆರ್ ಪೋದು ಜಠಾಧಾರಿಯಾದಿಪ್ಪೆರ್ ಪನ್ಪಿ ಅಭಿಪ್ರಾಯಲಾ ಉಂಡು. ತುಲುನಾಡುಡ್ ಅನಾದಿ ಕಾಲೊಡ್ದೇ ಬೆರ್ಮೆರೆನೊಟ್ಟುಗು ನಾಗಾರಾಧನೆ ಇತ್ತುದ್ ದುಂಬುಗು ಜೈನ ಅರಸೊಳಿಗೆದ ಕಾಲೊಡು ಯಕ್ಷಾರಾಧನೆ ಬತ್ತುಂಡು. ಬೆರ್ಮೆರೆ ಆರಾಧನೆ ಒರ್ಮೆಲ ಆನಗ ನಾಗಾರಾಧನೆ ಉಂತುದು ಪೋಪುಂಡು. ಯಕ್ಷರಾಜ ಬ್ರಹ್ಮನ ಪಿರವು ತರೆತ ಬಾಗೊಡು ನಾಗನ ಜಿಡೆತ ರಚನೆ ಬತ್ತುಂಡು. ಇಂಚಾನಗ ಬೆರ್ಮೆರೆ ಕಲ್ಪನೆ ಬತ್ತುದ್, ನಾಗನ್ - ಬೆರ್ಮೆರೆನ್ ಒಟ್ಟು ಸೇರಾದ್ ನಾಗಬ್ರಹ್ಮ, ನಾಗ ಬೆರ್ಮೆರಾದ್ ಆರಾಧನೆ ಸುರುಮಲ್ತೆರ್. ಸಂಸ್ಕೃತ ಬಾಸೆದ ಮೋಕೆಡ್ದಾದ್ ನಾಗಬೆರ್ಮೆರ್ ನಾಗಬ್ರಹ್ಮ ಆದ್ ಪೋಂಡು. ಕೆಲವು ತಿಕ್ಕುಡ್ ಬೆರ್ಮೆರೆ ಅಂಚಿ - ಇಂಚಿ ಒರ್ತ್ಯೊರ್ತಿ ನಾಗ ಕನ್ನಿಕೆನಕುಲು ಇತ್ತುಂಡಲಾ ಬೆರ್ಮೆರೇ ಪ್ರಧಾನ. ಲಿಂಗ ರೂಪೊಡು ಬೆರ್ಮೆರ್ ಉಪ್ಪುನಗಲಾ ನಡುಟು ಎತ್ತರದ ಬೆರ್ಮೆರೆ ಲಿಂಗ ಇತ್ತುದ್, ಅಂಚಿ - ಇಂಚಿ ರಡ್ಡ್ ಎಲ್ಯ ಲಿಂಗೊಲು ಇಪ್ಪೆದ. ಅವೆಟೊಂಜಿ ಲೆಕ್ಕೆಸಿರಿ, ಕುಡೊಂಜಿ ನಾಗೆಂದ್ ಪನೊಂತೆರ್. ಬೆರ್ಮಗ್ ಅರಸುಲ್ನ ದುತ್ತೈತ, ತರೆಟ್ ಕಿರೀಟ, ನಾಲಿಗ್ ಗುಂಡು ಸರ, ಕುಲ್ಲೆರೆ ಕುದುರೆ, ತಿಗಲೆಗ್ ಬೆದೆ ಕಾಪು(ಕವಚ), ಕಾರುಗ್ ಗಗ್ಗರದ ಮಾದರಿದ ಪದ್ದೆಯಿ ಇತ್ತುಂಡು. ತರೆತ ಪಿರವು ಪ್ರಭಾವಳಿ, ನಾಗನ ಜಿಡೆತ ಒರು ಇತ್ತುಂಡು. ಬೆರ್ಮನ್ ಬ್ರಹ್ಮನ್ದ್ ನಾಲ್ ತರೆ ಕೆತ್ತುದ್ ರಚನೆ ಮಲ್ತಿ ಮೂರ್ತಿಲಾ ತೂವರೆ ತಿಕ್ಕುಂಡು. ಯಕ್ಷೆರೆಗ್ ಯಕ್ಷ ಬ್ರಹ್ಮನ್ದ್ ಜೈನೆರ್ ಆರಾಧನೆ ಮಲ್ತೊಂತೆರ್. ಮುಗೇರ ಸತ್ಯೊಲೆನ ಕಲೊಟು ಬಾರೆದ ಬಂಬೆದ ಸುತ್ಯೆ ದೀದ್ ಬೆರ್ಮೆರೆನ್ ನಾಟಾದ್ ದೇವೆರಾದ್ ಆರಾಧನೆ ಮಲ್ತೊಂದಿತ್ತುದ್ ಇನಿ ಅಡೆಗ್ ಬೆರ್ಮೆರೆ ಗುಂಡ ಬೈದುಂಡು.

ಒರಿ ಬೆರ್ಮೆರ್, ಇರ್ವೆರ್ ಉಲ್ಲಾಕ್ಲು, ಒರ್ತ್ಯಪ್ಪೆ ಉಲ್ಲಾಲ್ದಿ ಈ ಕಲ್ಪನೆಡ್ ತೂಂಡ ಬೆರ್ಮೆರೆನ್ ಉಲ್ಲಾಯೆಂದುಲಾ ಪನ್ಪೆರ್, ಕಾವೆಂದೆಂದುಲಾ ಪನ್ಪೆರ್. ಲೆಕ್ಕೆಸಿರಿನ್ ಉಲ್ಲಾಲ್ದಿಂದ್ ಪನ್ಪೆರ್. ಲೆಕ್ಕೆಸಿರಿ ಮುದಲೆದ ಒರು, ಮಲರಾಯನ ಮುಗೊನು ಸೂಕ್ಷ್ಮವಾದ್ ತೂಂಡ ಮುದಲೆದ ಒರು ನೆಗತ್ ತೋಜುಂಡು. ಬಿರ್ಮೆರೆಗ್ ರಡ್ಡ್ ರೂಪ ಉಂಡು, ಮೆಗ್ಗಿ- ಪಲಯೆ, ಅಣ್ಣ - ಮೆಗ್ಗಿ, ಕಾಳರಾಹು - ಕುಮಾರಸ್ವಾಮಿ, ಪೂಮಾಣಿ - ಕಿನ್ನಿಮಾಣಿ, ನೇಲ್ಯರಾಯೆ -ಎಲ್ಯರಾಯೆ, ಕೋಟೆದ ದೇಸಿಂಗೆರ್, ನಡಿಯಂಗಳ್, ದೈವೊಂಗುಳು, ಮುತ್ತಪ್ಪನ್ - ತಿರುವಪ್ಪನ್, ಸೂಕ್ಷ್ಮ ರೂಪೊಡು ತೂಂಡ ಪೂರ ಒಂಜೆ ಮೂಲದ ಆರಾಧನಾ ಶಕ್ತಿಯಾದ್ ನೆಗತ್ ತೋಜುಂಡು. ನಮ ನಮ್ಮವೇ ಸರಿಂದ್ ಗುವೆಲ್ದ ಕಪ್ಪೆಯಾವಂದೆ ಉಡಲುನ್ ಕಡಲ್ದಲೆಕ ಮಲ್ತುದ್ ತೂಂಡ ನಮಡ ಆರಾಧನೆಡ್ ಏದ ಬೇದ ಬರಂದ್. ಬಿರ್ಮೆರೆ ಸಂದಿಡ್ 7 ಕಡಲ್ದ ನಡುಟು ಬಿರ್ಮೆರ್ ಉದಿಪುನ ಇಚಾರ ಬರ್ಪುಂಡು. ಅಪಗ ಬಿರ್ಮೆರೆ ವ್ಯಾಪ್ತಿ ಏತ್ ಮಲ್ಲಂದ್ ನಮ ತೆರಿಯೊನೊಡು. ಈ ಬೂಮಿನ್ 7 ಕಡಲುಲು ಸುತ್ತು ಪಾಡ್ದ ಪನ್ಪುನೆನ್ ನಮ ಅರ್ಥ ಮಲ್ತೊನೊಡಾತೆ. ಜಠಾಧಾರಿ - ಜಿಡೆತಾರ್ - ಕೂರ ಪೆರ್ಗಡೆ [ಕೀಲಾರಿ; ಕಣಂದೂರುದಲ್ತ] - ಕುಮಾರಸ್ವಾಮಿ (ಕುಮಾರೆ) [ಕುಮಾರ ಪರ್ವತ] - ಬಿರ್ಮೆರ್ - ಸುಬ್ರಹ್ಮಣ್ಯೆ ಉಂದು ಪೂರ ಒಂಜೆ. ಕುಡುಮದ ಮೂಲೊಡ್ಲಾ ಬಿರ್ಮೆರುಲ್ಲೆರುಂದ್ ನಮಕ್ ಮೂಲು ತೆರಿಯೊನ್ಲೆಕಾಪುಂಡು. ಸಿರಿನ ಆಲಡೆ, ಆರಾಧನೆಡ್ ಒಂಜಿ ಬೀಲೊಡ್ ಏಳ್ ಜಿಡೆ ದೆರ್ತಿ ನಾಗನ ಒರುತ ಬೆರ್ಮೆರೆನ್ ಗದ್ದಿಗೆ ಏರಾಯಿ ಬೊಕ್ಕನೆ ದುಂಬುದ ಚಾಕಿರಿ ಸುರಾಪಿನಿ. ಬೆರ್ಮೆರ್ ಪಂಡ ಅರೆ ಸಗ್ತಿರ್ದ್ ಮಲ್ಲ ಸಗ್ತಿ ನನೊಂಜಿ ಇಜ್ಜಿ. ಅಂಚಾದ್ ಸುರುಕು ತುಳುವೆರ್ ಬೆರ್ಮೆರೆನೇ ಆರಾಧನೆ ಮಲ್ಪುನಿ. ಬೆರ್ಮೆರೆ ಪುದರುನ್, ಲೆಕ್ಕೆಸಿರಿನ ಪುದರುನ್ ಲೆಪ್ಪೆರೆ ಪೋಡ್ಯೊಂತಿನ ತುಳುವೆರ್ ಅಕ್ಲೆನ್ ಉಳ್ಳಾಯ, ಉಲ್ಲಾಲ್ದಿಂದೇ ಲೆತ್ತೊಂದಿತ್ತೆರ್. ತಲೊಕು ಬನ್ನಗ ಕನ್ಯಾಕುಮಾರಿ(ಉಲ್ಲಾಲ್ದಿ), ಕುಮಾರಸ್ವಾಮಿ(ಬೆರ್ಮೆರ್) ತುಳುವೆರೆ ಬದುಕುದ ಕಷ್ಟ ಕೊರದೊಲೆನ್ ಮಾಜಾಯೆರೆ ಬೈದೆರ್. ಕಾಳರಾಹು ಪಂಡ ಸರ್ಪದ ಮೋನೆ, ಕಾಳ ಪಂಡ ಕಾಳಿಂಗ, ಕಪ್ಪುಂದು ಅರ್ಥ ಉಂಡು. ಕಾಳಿಂಗ ಬೊಕ್ಕ ಸರ್ಪೊನು(ಸರ್ಪ ಪಂಡ ಮಂಜಲ್ ಬೊಣ್ಯ ಬಣ್ಣ) ತುಳುಟ್ ಕರಿಯ ಸಂಕಮಾಲೆ, ಬೊಳಿಯ ಸಂಕಮಾಲೆಂದ್ ಪನ್ಪೆರ್. ಸಂಕಪಾಲೆಂದುಲಾ ಪನ್ಪೆರ್. ಕಾಳಿಂಗೆ ಕಪ್ಪು ಒರುತಾಯೆಂಡ, ನಾಗೆ ಪೊರ್ಲ ಜಿಡೆತಾಯೆ. ಬೆಮ್ಮೆರೆ ಕೈಟ್ ಜಲಪಾತ್ರೆ ಇತ್ತುಂಡ ಜಠಾಧಾರಿನ ಕೈಟ್ ಅಗ್ಗಿ ಪಾತ್ರೆ ಉಂಡು. ಒಂಜಿ ಜಲ ಸಂಸ್ಕೃತಿದ ಒರುವಾಂಡ, ನನೊಂಜಿ ಅಗ್ನಿ ಸಂಸ್ಕೃತಿದ ಒರುವಾದುಂಡು. ಇತ್ತೆ ಶಿಲ್ಪಿಲು ಬೆರ್ಮೆರೆ ಕೈಟುಲಾ ಅಗ್ನಿ ಪಾತ್ರೆ ಕೊರೊಂದುಲ್ಲೆರ್ ಪಂಡ ಅಂಚಿನ ಕೆತ್ತನೆ ಮಲ್ತೊಂದುಲ್ಲೆರ್. ಜಲ ಸಂಸ್ಕೃತಿದ "ಯಕ್ಷ" ಆರಾಧನೆ, ಅಗ್ನಿ ಆರಾಧನೆದ ಒರುವತ್ತ್. ಬೆರ್ಮೆರ್ ಜನ ಸಾಮಾನ್ಯೆರ್ ಮಾತ್ರ ಅತ್ತ್ ಅರಸೊಳಿಗೆದ ಅರಸುಲ್ನ ಆರಾಧ್ಯ ದೈವ ಆದಿತ್ತೆರ್. ಬೆರ್ಮೆರೆನ್ "ಸ್ವಾಮಿ" ಪಂದುಲಾ ಲೆಪ್ಪುವೆರ್. ಕಷ್ಟ ಬನ್ನಗ ತುಳುವೆರ್ ಈ ಸ್ವಾಮಿ ಬೂಮಿನ್ ನೆನೆತೊನ್ನಕುಲು. ಕುಂದಾಪುರದಂಚಿ "ಸ್ವಾಮಿ ಕೋಲ" ನಡಪುಂಡು. ಅವು ಬೆರ್ಮೆರೆ ಆರಾಧನೆ. ಅಂಚಾದುಪ್ಪುನಗ ತುಳುವೆರೆ ಬೆರ್ಮೆರ್ "ಪುರಾಣೀಕರಣ" ದ ಬ್ರಹ್ಮ ಅತ್ತ್.

"ಬಡಕಾಯಿ ಗಂಗೆರ್ದ್, ತೆನ್ಕಾಯಿ ರಾಮೇಸರ ಮುಟ್ಟ" ಬೆರ್ಮೆರೆ ಅಧಿಕಾರ ವ್ಯಾಪ್ತಿ ಪಂದ್ ಸಂದಿಲೆಡ್ ಬರ್ಪುಂಡು. ಮೂಲು ಬಡಕಾಯಿ ಗಂಗೆ ಪಂಡ ಕಾರವಾರ ಗಂಗೊಳ್ಳಿದ ಕಾಳಿ ಸುದೆನಾ ಅತ್ತ್ ಕಾಶಿದ ಗಂಗಾ ಸುದೆನಾ ಒವುಂದು ತೂವೊಡಾಪುಂಡು. ಬೆರ್ಮೆರೆ ಪ್ರಧಾನ ಆರಾಧನಾ ಕ್ಷೇತ್ರ ಪಂಡ ಆಲಡೆಲು. ಬೆರ್ಮೆರ್ನ ಒಟ್ಟುಗು ನಾಗೆ, ಮೈಸಂದಾಯೆ, ಲೆಕ್ಕೆಸಿರಿ, ಕ್ಷೇತ್ರಪಾಲೆ, ಎಳ್ವೆರ್ ಸಿರಿಕುಲು ಪರಿವಾರ ಶಕ್ತಿಲಾದಿಪ್ಪುವೆರ್. ಬೆರ್ಮೆರೆ ಗುಂಡ ಇಜ್ಜಂದಿನೌಲು ಬನೊಟು ಬೆರ್ಮೆರೆನ್ ನಂಬುವೆರ್. ಅಂಚಾದ್ ಬೆರ್ಮೆರೆನ್ ಬನ ಶಾಸ್ತಾರಂದುಲಾ ಲೆಪ್ಪುವೆರ್. ಬೆರ್ಮೆರೆ ಬನೊಟು ನೆಲ ಮುಟ್ಟುದು ಪುಂಚ ಬುಳೆನಗ ನಾಗೆ ಸೇರೊಂದು ನಾಗ ಬೆರ್ಮೆರಾದ್ ಆರಾಧನೆ ಪಡೆಪೆ. ಕುಂದಾಪುರದಂಚಿ ಆಲಡೆನ್ "ಗದ್ದಿಗೆ" ಪಂದ್ ಪನ್ಪೆರ್. ಆಲದ ಮರತಡಿಟ್ ಇತ್ತಿನ ಬೆರ್ಮೆರೆ ಆಲಡೆನ್ (ಕ್ರಿ . ಶ 1403 ತ ಶಾಸನ ) "ಬ್ರಹ್ಮರಾಲ" ಪಂದ್ ಪನ್ಪೆರ್. ಮಲಾರ್ ಡ್ ಮಲರಾಯಗ್ ಬೆರ್ಮೆರೆ ಸಾನೊಡು ನೇಮ ನಡಪುಂಡು.ಅಪಗ ಬೆರ್ಮೆರೊಟ್ಟುಗು ಲೆಕ್ಕೆಸಿರಿನ ಸಾನಿಧ್ಯ ತೆರಿಲೆಕ್ಕಾಂಡ್. ಮುದಲೆದೊರುತ ಲೆಕ್ಕೆಸಿರಿಗ್ಲಾ, ಮಲರಾಯನ ಮುಗತ ಬಾಯಿದ ರಚನೆಗ್ಲಾ ಓಲ್ಪಡಿ ಮಲ್ತೊಂಡ ದಾದನಾ ಒಂಜಿ ಸೂಕ್ಷ್ಮ ಇಚಾರ ಅವ್ಲು ನೆಗತ್ ತೊಜುಂಡು . ಕುಂದಾಪುರೊಡು ಆಲಡೆನ್ "ಹುಟ್ಟಿನ ಚಿತ್ತೇರಿ" ಪಂದ್ ಪನ್ಪೆರ್. ದೈವದ ಆರಾಧನೆಡ್ಲಾ 'ಚಿತ್ತಾರಿ' ಪನ್ಪಿ ಸಬ್ದ ಕೇನೆರೆ ತಿಕ್ಕುಂಡು. ಅಳುಪೆರ್ನ ಶಾಸನೊಡ್ಲಾ ಬೆರ್ಮೆರ್ ನ ಉಲ್ಲೇಖ ಬರ್ಪುಂಡು. ಮೊಕ್ಲೆಗ್ಲಾ ಬೆರ್ಮೆರ್ ಆರಾಧ್ಯ ದೈವ ಆದಿತ್ತೆರ್ . ಕಜೆಗುತ್ತು ಬೆರ್ಮೆತಾನ, ಜಪ್ಪಿಮೊಗರು ಬೆರ್ಮತಾನೊಲೆಡ್ ಬೇತೆ ಬೇತೆ ಆರಾಧನೆಲುಪ್ಪುವ. ಬೆಮ್ಮೆರೆ ಆಲಡೆ ,ಸಾನ ಗುಂಡೊಲೆಡ್ ಕೆಲವು ತಿಕ್ಕುಡ್ ಪರಿವಾರ ಸಗ್ತಿಲ್ನ ಆರಾಧನೆ ಇತ್ತುಂಡು , ಕೆಲವು ಕೋಡಿಡ್ ಸಿರಿನ ಆರಾಧನೆ ಉಪ್ಪುಂಡು. ವಂಡಾರು ಪನ್ಪಿ ಜಾಗೆಡ್ ಬೆರ್ಮೆರೆ ಗುಂಡ ಇತ್ತುಂಡು, ಕೆದಂಬಾಡಿಡ್ ಕಂಡ ಕೋರಿದಪಗ ಬೆರ್ಮನ ಕೋಲ ನಡಪುಂಡು. ದುತ್ತೈತೊಲು ದೈವೊಲೆನ ದುತ್ತೈತೊಡ್ದು ಬೇತೆಯಾದಿಪ್ಪುಂಡು. ಕಾಡಬೆಟ್ಟುಡು ಬೆರ್ಮೆರೆ ಕೋಲ ಚಾವಡಿಡ್ ನಡಪುನಗ ಅವೆಡ್ದು ದುಂಬು ಬೆರ್ಮೆರ್ ಪೂಕರೆ ಪಾಡುನ ಕಂಡದ ಕರೆಟಿತ್ತುದು ಕೈಟ್ ಪಜ್ಜಿ ಮಡಲುಡ್ ಮಲ್ತಿನ ಕುದುರೆದ ರಚನೆ ಇತ್ತುದ್ ಚಾವಡಿಗ್ ಬರ್ಪುನ ದುಂಬು ದೈವ ಚಾವಡಿದ ಕೈತಲ್ದ ಬನೊಟು ಕುದುರೆದ ಆ ರಚನೆನ್ ದೀದ್ ಬರ್ಪುಂಡು. ಬೆರ್ಮೆರೆ ಕೋಲ ಬುಡ್ದು ಬೇತೆ ಕೋಲೊಡು ತಾರೆದ ತಿರಿತ ಕುದುರೆ ತೂವರೆ ತಿಕ್ಕುಜಿ. ನಾಗಗ್ ಬೊಕ್ಕ ಬೆರ್ಮೆರೆಗ್ ಬೇತೆ ಬೇತೆನೆ ಕೋಲ ಇಪ್ಪುಂಡು. ಅವೆನ್ ತೂನಗ "ನಾಗ ಬೊಕ್ಕ ಬ್ರಹ್ಮೆ" ಬೇತೆ ಬೇತೆನೆ (ನಾಗ ಬೊಕ್ಕ ಬೆರ್ಮೆರ್) ಪಂಡುದ್ ತೆರಿಯುಂಡು. ಪೂಕರೆ ಕಂಬ ನಡ್ಪುನ ದುಂಬು ಬೆಮ್ಮೆರೆ ಪೂಜೆ, ಕೋಲ ನಡಪುಂಡು. ಕೆಲವು ಕೋಡಿಡ್ ಪೂಕರೆ ಕಂಬ ಕಂಡೊಡು ನಾಟಾದ್ ಚಾವಡಿಗ್ ಬತ್ತುದ್ ಬೆರ್ಮೆರೆಗ್ ಕೋಲ ನಡಪುಂಡು. ಪೂಕರೆ ಬೆರ್ಮೆರೆ ಕೊಡಿಮರತ ಒರುಗೆ. ಅಂಚಾದ್ ಬೆರ್ಮೆರೆ ಆರಾಧನೆ ತುಳುನಾಡ ಕೊಡಿಕಡೆ ನಡತೊಂದಿತ್ತುಂಡುಂದ್ ತೆರಿಯುಂಡು. ಕೋಟಿ ಚೆನ್ನಯೆರೆ ಆರಾಧ್ಯ ದೈವ ಕೆಮ್ಮಲಜೆತ ಬೆರ್ಮೆರೆಗ್ ಪೊಸ ಗುಂಡ ಆದ್ ನಾಗಬ್ರಹ್ಮನ್ದ್ ಪುದರಿತ್ತುದ್ ಔಲು ವೈದಿಕ ವಿಧಿ ವಿಧಾನೊಡು ಆರಾಧನೆ ನಡಪುಂಡು. "ಕುಡಲಡ್ದ್ ಬಾರ್ಕೂರು ಮುಟ್ಟ, ಬಾರ್ಕೂರುರ್ದು ಕುಡಲ ಮುಟ್ಟ ಅಡ್ಡ ಲೆಕ್ಕೆಸಿರಿ, ನೀಟ ಬೆರ್ಮೆರ್, ನೀರಾದ್ ಕನ್ಯೆಲು ಉದಿಯ ಬೆಂದೆರ್" ಪಂದ್ ಪಾಡ್ದನ ಪನ್ಪುಂಡು. ಅಂಚನೆ "ಕಲ್ಲುಡ್ ನಾಗೆ, ಪುಂಚೊಡು ಸರ್ಪೆ, ಗುಂಡೊಡು ಬೆರ್ಮೆರ್" ಪಂದುಲಾ ಸಂದಿಡ್ ಬರ್ಪುಂಡು. ಪುಂಚೊಡು ಬೆರ್ಮೆರೆನ್, ಗುಂಡೊಡು ನಾಗನ್ ಆರಾಧನೆ ಮಲ್ಪುಜೆರ್. ಪ್ರತಿಯೊಂಜೆಕ್ಲಾ ಬೇತೆ ಬೇತೆ ಆರಾಧನೆ ಉಂಡು. ಅಂಚ ನಾಗೆನೇ ಬೇತೆ, ಬೇರ್ಮೆರೇ ಬೇತೆನ್ದ್ ತೆರಿಯುಂಡು. ನಾಗ ಬೆರ್ಮೆರ್ ಖಂಡಿತಾ ಅತ್ತುಂದು ಗೊತ್ತಾಪುಂಡು. ಬೆರ್ಮೆರ್, ಲೆಕ್ಕೆಸಿರಿ, ಯಕ್ಷ ಯಕ್ಷಿನಕುಲು ಇಂಚ ಪರಿವಾರ ಶಕ್ತಿಲಾದ್ ಆರಾಧನೆ ನಡಪುಂಡು.

ತುಳುನಾಡ ಮೂಲ ನಿವಾಸಿಲು ಬನತ ಕಲ್ಲುಡ್ ಬೆರ್ಮೆರೆನ್ ನಂಬ್ಯೆರ್. ದೈವೊಲೆಗ್ ನೇಮ ಕೋಲ ಕೊರ್ನಗ, ಬೆರ್ಮೆರೆನ್ ಸುರುಕು ದೇವೆರಾದ್ ಆರಾಧನೆ ಮಲ್ತೆರ್. ಮೋನೆಗ್ ಬಣ್ಣ ಪಾಡ್ದ್ ಆರಾಧನೆದ ಸಂಪ್ರದಾಯ ಸುರು ಮಲ್ತೆರ್. ಒಂಜಿ ಜನಾಂಗ ದೇವಿನ್ ಗೋಂದೋಲು ಪೂಜೆ, ನಲಿಕೆಡ್ ಆರಾಧನೆ ಮಲ್ತೆರ್ಡ, ಒರಿನ ಒಂಜಿ ವರ್ಗ ಅವ್ವೇ ದೇವಿಗ್(ತ್ರಿಕಾಲ ಪೂಜೆ) ಮೂಜಿ ಪೊರ್ತು ಪೂಜೆ ಮಲ್ತೆರ್. ಶಕ್ತಿ ಒಂಜೆ, ಆರಾಧನೆದ ಕಿರಮ ಬೇತೆ. ಕಾಳ ಭೈರವೆ, ಬಿರ್ಮೆರ್ ಇಂಚ ಎಂಚಿನ ಕಣ್ಣುಗ್ ತೋಜಂದಿ ಸಗ್ತಿಲುಲ್ಲನ ಪ್ರಾಕೃತಿಕ ವಸ್ತುಲೆನ್ ಗಳಸಾದ್, ಬಣ್ಣ ಪಾಡ್ದ್ ನಲಿತುದ್ ಪೆರಣಿ ಬಲಿ ಕೊರ್ದು ಆರಾಧನೆ ಮಲ್ತೆರ್. ತಾಂತ್ರಿಕ ಶಕ್ತಿದ ದೈವಾರಾಧನೆದ ಮೂಲ ಆಯಿನ ಶೈವ, ಶಾಕ್ತ ಆರಾಧನೆಡ್ ಬೆರ್ಮೆರ್ ನೆಗತ್ ತೋಜ್ವೆರ್. ಇಂಚಾಂಡ ಶೈವಾರಾಧನೆತ ಒರುಟು ಬೆರ್ಮೆರ್ ಒರಿವೆರುಂದ್ ಬೆರ್ಮೆರ್ ಬ್ರಹ್ಮ ಲಿಂಗೇಸರ, ಮಹಲಿಂಗೇಸರ ಆದ್ ಪೋಯೆರ್. ಮೇಗಿನ ಏಳ್ ಲೋಕ, ತಿರ್ತ ಏಳ್ ಲೋಕ; ಪದಿನಾಲ್ ಲೋಕದ ಪರಬೆರ್ಮ ಸ್ವರೂಪದ ಸತ್ಯಂದ್ ಈಸರನ್ ನಂಬೊಂತೆರ್. ಮಾತಾ ದೇವೆರೆಡ್ದ್ ಮಿತ್ತ ದೇವೆರುಂದ್ ಇಸರ ದೇವೆರೆನ್ ಎನ್ನಿನ ಪೆರಿಯಾಕ್ಲು ಅವ್ವೇ ಸ್ವರೂಪದ ಬೆರ್ಮೆರೆನ್ ಮಾತ ದೇವೆರೆರ್ದ್ ಮಲ್ಲಂದ್ ತೆರಿದ್ ತುಳುವೆರ್ ಆರಾಧನೆ ಮಲ್ತೆರ್. ಉಲ್ಲಾಲ್ದಿಗ್(ಲೆಕ್ಕೆಸಿರಿ) ಮಲ್ಲಿಗೆ ಪುರ್ಪದ ಪರಕೆ ಮಲ್ಲ ಪರಕೆಯಾದಿತ್ತುದ್ ಉಲ್ಲಾಲ್ದಿನ್ ದೇವಿ ಮಲ್ತುದ್ ದೇವೆರೆ ಒರುಟು ಪೂಜೆಡ್ ಆರಾಧನೆ ಮಲ್ತೆರ್ಡಲಾ ಅಲೆಗ್ ಮಲ್ಲ ಪರಕೆ ಮಲ್ಲಿಗೆ ಪೂವಾಂಡ ತುಳುನಾಡ ದೇವಿ, ದೈವ ಆದಿತ್ತುಂಡ್ ಪನ್ಪುನೆಕ್ ಸಂಶಯನೇ ಇಜ್ಜಿ. ಬೆರ್ಮೆರೆರ್ದ್ ಮಲ್ಲ ಸಗ್ತಿ ತುಳುವೆರೆಗ್ ಬೇತೆ ಇಜ್ಜಾನ್ಡ್. ಒರಿನ ಪೂರ ಅಕ್ಲೆಗ್ ಅರೆನ ಬೇತೆ ಬೇತೆ ರೂಪೊಲಾದ್ ತೋಜಿಯ. ಬೆರ್ಮೆರ್ ಬೊಕ್ಕ ಉಲ್ಲಾಲ್ದಿ ಈಸರ ಬೊಕ ಪಾರೊತಿಂದ್ ನಂಬಿನ ತುಳುವೆರ್ ದೈವೊಲೆಡ್ಲಾ ಆ ಸಗ್ತಿನ್ ತೂಯೆರ್. ಬೆರ್ಮೆರ್, ಈಸರೆ ವೈದ್ಯನಾಥೆ ಆದ್ ಪೊಂಡ, ಜುಮಾದಿ ಪಾರೊತಿನ ದಶಮಾ ಮಹಾವಿದ್ಯಾ ರೂಪದ ಧೂಮಾವತಿಯಾದ್ ತೋಜಿದ್ ಬತ್ತಲ್.

ಬೆರ್ಮೆರೆನ್ ಬ್ರಹ್ಮಲಿಂಗೇಶ್ವರ(ಮಾರಣಕಟ್ಟೆ), ಖಡ್ಗೇಶ್ವರ(ಹಿರಿಯಡ್ಕ), ಅರ್ಧನಾರೀಶ್ವರ(ಮದ್ಯ ಬೂಡು), ಬೆರ್ಮ ಉಲ್ಲಾಯೆ(ಕಂಡೇವು) ಪಂದ್ ಆರಾಧನೆ ಮಲ್ಪುವೆರ್. ಪೆರಾರ ಬ್ರಹ್ಮ ಬಲಾಂಡಿ ಸಾನೊಡ್ಲಾ ಬೆರ್ಮೆರೆಗ್ ಆರಾಧನೆ ನಡಪುಂಡು. ಇನಿ ಪೂರಾ ಪುರಾಣೀಕರಣ ಆದ್ ಬೆರ್ಮೆರ್ ನಾಗಬ್ರಹ್ಮ ಆದ್, ಲೆಕ್ಕೆಸಿರಿ ರಕ್ತೇಶ್ವರಿ ಆದ್ ಪೋತುಂಡ್. ಅಳುಪ ಅರಸೆರೆ ಸಾರ ವರ್ಸದ ಆಡಳ್ತೆಡ್ 14ನೇ ಶತಮಾನ ಮುಟ್ಟ ಬೆರ್ಮೆರ್ ಬೆರ್ಮೆರಾದೇ ಒರಿದಿತ್ತೆರ್. ನಾಗೆ ಅಡೆಮುಟ್ಟ ಸುಬ್ರಹ್ಮಣ್ಯೆ ಆದಿಜ್ಜಾನ್ಡ್. ವೈದಿಕೀಕರಣದ(ಪುನರ್ವಿಂಗಡಣೆ) ಪೊಸ ಉದಿಪುಡು ನಾಗೆ ಸುಬ್ರಹ್ಮಣ್ಯೆ ಆಯೆ, ಬೆರ್ಮೆರ್ ಬ್ರಹ್ಮ ಆಯೆರ್. ಇನಿ ಅಷ್ಟಮಂಗಲ ಚಿಂತನೆಡ್ಲಾ ಅಂಚನೆ ನಮ್ಮ ದೈವೊಲು ಪೂರ ಅಕ್ಲೆಗ್ ದೇವಿನ, ದೇವೆರ್ನ ಅಂಶೊಲಾದ್ ತೋಜಿದ್ ಆ ಅಂಶೊಲೇ ಗಟ್ಟಿಯಾದ್ ದೇವಿ, ದೇವೆರಾದ್ ಮೂಲ ಸ್ವರೂಪದ ದೈವೊಲು ಪುದರ್ ದಾಂತೆ ಮಯಕಾವೊಂದುಲ್ಲ. ಉದಾರ್ಮೆಗ್ ಲೆಕ್ಕೆಸಿರಿ - ರಕ್ತೇಶ್ವರಿಯಾಂಡ್, ಜುಮಾದಿ - ಧೂಮಾವತಿಯಾಂಡ್, ಮೈಸಂದಾಯೆ - ನಂದಿಗೋಣ ಆಂಡ್, ಗಿರಾವು - ಕಿರಾತೇಶ್ವರೆ ಆಂಡ್. ನಮ್ಮ ಎರಿಯಾಕ್ಲು ನಮಕ್ ದೀನ ಪುದರ್ ಲೆತ್ತುಂಡ ಮಾತ್ರ ನಮ ಓಕೊನುವ. ಬೇತೆ ಆ ಪುದರ್ ಪೊರ್ಲುಂಡುಂದು ಬೇತೆ ಪುದರ್ಡ್ ಲೆತ್ತುಂಡ ಓಕೊನೊಯ. ಜಗತ್ತುದ ವಾ ಜಾಗೆಡ್ ಪಂಡಲ, ವಾ ಜಾಗೆಡ್ ಲೆತ್ತೆರ್ಡಲ ನಮ್ಮ ಅಪ್ಪೆ ಅಮ್ಮೆ ದೀನ ಪುದರುನೇ ಲೆಪ್ಪುನಿ. ಇನಿ ಕೆಲವೊಂಜಿ ಅಪ್ಪೆ ಅಮ್ಮರ್ದ್ ಉದಿತುದ್, ಬೀರೆರಾದ್ ಪುಗಾರ್ತೆ ಪಡೆದ್ ಕರಿದ್ ಪೋದು ದೈವೊಲಾಯಿ ಬೊಕ್ಕ ಶಿವನ ಮಗೆ, ವಿಷ್ಣುನ ಮಗೆ/ಅಂಶಂದ್ ಪಂಡ ನಿಜವಾಯಿನ ಅಮ್ಮನ ಬಿಲೆ ಮಯಕಾಪುಂಡು. ಅಂಚೆನೇ ನಮ್ಮ ದೈವೊಲೆಗ್ ಪೆರಿಯಾಕ್ಲು ದೀನ ಪುದರ್ಡೇ ಲೆತ್ತುಂಡ ಓಕೊನ್ದು ಪತಿಮಾನಿನ , ಕಟಿಮಾನಿನ ಮಿತ್ತ್ ಬತ್ತುದ್ ನಮಕ್ ಅಭಯ ಕೊರುವ ವಿನಃ ದೇವ ದೇವಿಲಾದ್ ಲೆತ್ತುಂಡ ಖಂಡಿತಾ ಬರಯ. ಕಟ್ಟುನಕುಲ್ಲಾ ದೈವೊಗುಂದು ಪಡಿಯರಿ ಪತ್ತುದ್ ಯಾನ್ ದೇವೆರ್, ದೇವಿಂದ್ ಪನಂದೆ ದೈವ ಆದೇ ನುಡಿ ಕೊರುಂಡ ಅಕುಲು ಮಲ್ತಿ ಚಾಕಿರಿ ಪಲಿತೊಗು ಬರ್ಪುಂಡು.

ಬೆರ್ಮೆರೆಗ್ "ಕಂಚಿಲ್ ಸೇವೆ" ಪರಕೆಲಾ ನಡಪುಂಡು. ಜೋಕ್ಲು ದಾಂತಿನಕ್ಲು ಜೊಕ್ಲಾವೆರೆ ಬೆರ್ಮೆರೆಗ್ ಪರಕೆ ಪಂಡುದು ಬೂಟುನ ಪರಕೆನ್ ಕಂಚಿಲ್ ಸೇವೆಂದ್ ಪನ್ಪೆರ್. ಕೆದಂಬಾಡಿದ ಮುಂಡಾಲಗುತ್ತುಡು ವರ್ಸಲ ಬೆರ್ಮೆರೆಗ್ ಕೋಲ ನಡಪುಂಡು. ಅವ್ಲು ಭಂಡಾರದಿಲ್ಲಡ್ ಉಜ್ಜಾಲುಡ್ ಬೆರ್ಮೆರೆ ಮಣಿ ಕಡ್ಸಲೆ ದೀದುಪ್ಪುವೆರ್. ಸಾಂತೂರು, ಕಾಸ್ರೋಡುದ ಕುಳೂರು ಖಂಡಿಗೆಡ್ ಬೆರ್ಮೆರೆ ನೇಮ ನಡಪುಂಡು. ಖಂಡಿಗೆಡ್ ಬೆರ್ಮೆರೆಗ್ ಬೂಡುಡು ಬೊಕ್ಕ ತಾನೊಡ್ಲಾ ಬೇತೆ ಬೇತೆ ಉಜ್ಜಾಲಿತ್ತುದ್ ಬೆರ್ಮೆರೆನ್ ಔಲು "ಧರ್ಮದರಸು" ಪಂಡುದ್ ಆರಾಧನೆ ಮಲ್ಪುವೆರ್. ಅವ್ಲು ಧರ್ಮದರಸು ಬೆರ್ಮೆರ್ನ ಮೂರ್ತಿ ಕುದುರೆದ ಮಿತ್ತ್ ಕುಲ್ಲುದಿತ್ತುದ್ ಕೈಟ್ ಕಡ್ಸಲೆ ಪತೊಂದಿನ ರಚನೆ ಉಂಡು. ಕೋಟಿ ಚೆನ್ನಯೆರೆ ಪಾಡ್ದನದ ಸುರುತ ಸಂದಿ ಬೆರ್ಮೆರೆ ಸಂದಿ, ಲೆಕ್ಕೆಸಿರಿನ ಸುರುತ ಸಂದಿಲ ಬೆರ್ಮೆರೆನ ಸಂದಿಯೆ. ಆನಿದ ಕಾಲೊಡು ಪರ್ವತೊಲೆಗ್ ರೆಂಕೆ ಇತ್ತುದ್, ಮಾತ ಪರ್ವತೊಲೆನ ರೆಂಕೆ ಪೊಲಿತಿನ ಇಂದ್ರಗ್ ಬೆರ್ಮೆರೆ ಗದ್ದಿಗೆ ಏರ್ದ್ ಇತ್ತಿನ ಪರ್ವತೊನು ಪೊಳಿಪೆರಾಯಿಜಿ ಪಂಡ ಬೆರ್ಮೆರೆ ತಾಕತ್ತ್ ಏತ್ ಪಂಡುದ್ ನಂಕ್ ತೆರಿಯುಂಡು. ಅವ್ಲು ಗದ್ದಿಗೆ ಏರ್ನ ಬಿರ್ಮೆರೆಗ್ ಬೊಲಿಯ ಸತ್ತಿಗೆ ತರೆಕ್ ನಿರೆಲಾದಿತ್ತುಂಡು. ಬೆರ್ಮೆರ್ ಏಳ್ ಜನ ಚಾಕಿರಿದಕ್ಲೆನ್(ಆಳು), ಏಳ್ ಜನ ಕನ್ಯೆನಕ್ಲೆನ್ ಸೃಷ್ಟಿ ಮಲ್ತುದ್ ಚಾಕಿರಿದ ಏಳ್ ಜನ ಬೇಲೆದಕ್ಲು ಬೊಳ್ಳಿದ ಎದ್ಪಾಲೆಡ್(ಬೀಸಣಿಗೆ) ಬೆರ್ಮೆರೆಗ್ ಗಾಳಿ ಬೀಜಾವೊಂತೆರ್ಡ, ಏಳ್ ಜನ ಕನ್ಯೆನಕ್ಲು ಗದ್ದಿಗೆ ಏರ್ನ ಬೆರ್ಮೆರೆಗ್ ಹವಳ ಇತ್ತಿನ ಪದ್ದೆಯಿದ(ಬಂಗಾರ) ಅರಿವಾಣೊಡು ಆರತಿ ಮಲ್ತುದ್ ಪೂವರಿ(ಅಕ್ಷತೆ) ಪಾಡೊಂತೆರ್ಗೆ. ಸಿರಿನ ಆರಾಧನೆಡ್ ಒಂಜಿ ಬೀಲೊಡು ಏಳ್ ಜಿಡೆತ ಬೆರ್ಮೆರೆನ ಗದ್ದಿಗೆ ಏರಾದ್ ಎಳುವೆರ್ ಸಿರಿಕುಲೆನ್ ಆರಾಧನೆ ಮಲ್ಪುವೆರ್. ಮೂಲು ಕುಮಾರ ಪಾತ್ರಿ ಗದ್ದಿಗೆಗ್ ಪೂಜೆ, ಆರತಿ ಮಲ್ಪುವೆರ್.

ಕೋಟಿ ಚೆನ್ನಯೆರೆ ಸಂದಿಡ್ ಬರ್ಪುನ "ಏಕ ಸಾಲೆರೆ ದೆಯ್ಯಾರ" ಸಂದಿಡ್ ಪರಾಕ್ರಮಿ ಆಯಿನ "ಬಾಮುಲ್ಲ ಕುಮಾರ" ನ ವರ್ಣನೆ ಬರ್ಪುಂಡು. ಗಟ್ಟದ ಮಿತ್ತುರ್ದ್ ಮಾಂಕಾಳಿನ ಅಪ್ಪಣೆದಲೆಕ ಗಟ್ಟ ಜತ್ತುದ್, ಏಳ್ ಮಲೆ ದಾಂಟುದ್ ಕುಕ್ಕೆಗ್ ಬನ್ನಗ ಎದುರಾಯಿನ ದೈವ ಬೂತೊಲೆನ್ ಸೋಪಾದ್ ಲೆಕ್ಕೆಸಿರಿನ ಕೈತಡೆ ಬತ್ತುದ್ ಕುಕ್ಕೆ ತಲೊಟು ನಿಲೆಯಾಯೆರೆ ಬಾಮುಲ್ಲ ಕುಮಾರೆ ಕೇನ್ನಗ, ಈ ಪರಾಕ್ರಮಿಯಾಂಡ ಬಲತುಗ್ ಪರಪಿ ತುದೆನ್ ಎಡತುಗ್ ತಿರ್ಗಾಲಂದ್ ಲೆಕ್ಕೆಸಿರಿ ಪನ್ನಗ ಆಯೆ ಅಂಚನೆ ಬಲಕ್ ಪರಪಿ ತುದೆನ್ ಎಡತುಗ್ ತಿರ್ಗಾದ್ ಪರಿಪುಲೆಕ ಮಲ್ತುದ್ ಆ ತುದೆಕ್ "ಕುಮಾರ ಧಾರೆ" ಸುದೆಂದ್ ಪುದರ್ ದೀಯೆ. ತಾನ್ ಬತ್ತಿನಾಯೆ "ಕುಮಾರ ಬೆರ್ಮೆ" ಪಂದ್ ಲೆಕ್ಕೆಸಿರಿಡ ಪನ್ನಗ, ಕುಕ್ಕೆಡ್ ಕುಮಾರ ನಾಗೆ ಉಲ್ಲೆ, ಆಯನೊಟ್ಟುಗು ಸೇರಿಗೆಯಾದಿಪ್ಪುಂದು ಪನ್ನಗ ಅವ್ಲು ನಾಗ ಬೆರ್ಮೆಯಾದ್ ನಿಲೆಯಾಪೆ. ಶಿವನ ಮಗೆ ಕುಮಾರೆ - ಸುಬ್ರಹ್ಮಣ್ಯೆ ಆಂಡ, ಸ್ವಾಮಿಂದ್ ಪುದರ್ ಪಡೆಯಿನ ಬೆರ್ಮೆರ್ ಕುಮಾರಸ್ವಾಮಿಯಾದ್ ತಲೊಟು ನಿಲೆಯಾಪೆರ್. ಕುಮಾರಧಾರೆಡ್ ಕೆಮ್ಮಲೆ ಕೇತ್ರೋಡಿದ ಅರಿಯಬೆತ್ತು, ಸುರಿಯಬೆತ್ತು ಪನ್ಪುನಕುಲು ಬೊಳ್ಳಿದ ಗಿಂಡೆ, ಬಂಗಾರ್ದ ಅರಿವಾಣ ಕುಮಾರದಾರೆ ತುದೆ ಬರಿಟ್ ದೀದ್, ತುದೆಟ್ ಮೀದ್ ಮಿತ್ತ್ ಬನ್ನಗ, ದೀನ ವಸ್ತುಲು ತೊಜಂದೆ ಆನಗ, ನಮ ದೀನ ವಸ್ತುಲು ತಿಕ್ಕುಂಡ ಕೆಮ್ಮಲೆಡ್ ಎಂಕುಲು ಕುಮಾರ ಬೆರ್ಮೆರೆಗ್ ಗುಂಡ ಕಟ್ಟಾವಂದ್ ಎನ್ನಿನಗ, ಕಳೆದ್ ಪೋಯಿನ ವಸ್ತುಲು ತಿಕ್ಕುವ. ಅಕುಲು ನಾಗ ಬೆರ್ಮೆರೆಡ ಕೇನ್ನಗ ಕುಮಾರಧಾರೆದ ಒಂಜಿ ಪುಂಡಿ ಮಣ್ಣ್, ಒಂತೆ ನೀರುನ್ ಕೊನಯೆರೆ ಪನ್ನಗ ಅಕುಲು ಅಡೆಗ್ ಅವೆನ್ ಕೊನೊದು ಮಣ್ಣುಡ್ ತಾಪನೆ ಮಲ್ಪುವೆರ್. ಕುಕ್ಕೆರ್ದ್ ಪಿದಡಿ ಬೆರ್ಮೆರ್ ಕೆಮ್ಮಲೆಟ್ ಮಣ್ಣ ಮುದ್ದೆಡ್ ಉಲಯಿ ಸೇರ್ದ್(ಆವಾಹನೆಯಾದ್) ಅವ್ಲು ನಿಲೆಯಾಪೆರ್. ಅಂಚನೆ ತುಳುನಾಡ ಪುರಲುಡ್ಲಾ ಸುಬ್ರಹ್ಮಣ್ಯ ದೇವೆರೆಗ್ ತೇರ್ ಒಯ್ಪುನೆನ್ ತೂನಗ ಈ ಬೆರ್ಮೆರೆ ಆರಾಧನೆಗ್ಲಾ ಈ ಕ್ಷೇತ್ರೊಗ್ಲಾ ದಾದಾಂಡಲಾ ಸಮ್ಮಂದ ಉಪ್ಪುಂದು ತೆರಿಯುಂಡು. ಕುಕ್ಕೆ ಬೊಕ್ಕ ಸುಬ್ಬೆ ಪನ್ಪುನಕ್ಲೆರ್ದ್ ಕುಕ್ಕೆ ಸುಬ್ರಹ್ಮಣ್ಯ(ಮಲೆಕುಡಿಯ ಜನಾಂಗದಕುಲು) ಆಂಡುಂದ್ ಒಂಜಿ ತಿಕ್ಕುಡು ವಿಚಾರ ತಿಕ್ಕುಂಡ "ಕುಕ್ಕೆ" ಪಂಡ ತುಳುಟು "ಕುಮಾರೆ", "ಬಾಲೆ" ಪಂಡುದ್ ಅರ್ಥ ಉಂಡು ಪನ್ಪೆರ್.

ತುಳುನಾಡ ಕುಕ್ಕೆ ಆದಿಡ್ ನಾಗಾರಾಧನೆದ ಒಂಜಿ ಕ್ಷೇತ್ರ ಆದ್, ಯಕ್ಷ ಸಂಸ್ಕೃತಿ ಪಿದಯಿಡ್ದ್ ಅಡೆಗ್ ಬತ್ತುದ್, ಯಕ್ಷಾರಾಧನೆ ನಾಗಾರಾಧನೆದೊಟ್ಟುಗು ಸೇರ್ದ್, ಯಕ್ಷೆರೆ ಅರಸು ಬೆರ್ಮೆರ್ ನಾಗನೊಟ್ಟುಗು ಸೇರ್ದ್ ನಾಗಬೆರ್ಮೆರಾಯೆರ್. ವೈದಿಕ ಆರಾಧನೆ ಬನ್ನಗ ಯಕ್ಷ ಬೆರ್ಮೆರ್ ಸುಬ್ರಹ್ಮಣ್ಯ ಆದ್ ಆರಾಧನೆ ಪಡೆಯೆರುಂದ್ ಪುಗಾರ್ತೆದ ಜನಪದ ಸಂಶೋಧಕೆರಾಯಿನ ಡಾ।। ಪಾಲ್ತಾಡಿ ರಾಮಕೃಷ್ಣಾಚಾರ್ ಅರೆನ ಒಂಜಿ ಕೃತಿಟ್ ತೆರಿಪಾದೆರ್. ವೈದಿಕ ಪುರಾಣೀಕರಣೋಡ್ದಾರ್ದ್ ತುಳುನಾಡ ನಾಗಾರಾಧನೆ, ಬೂತಾರಾಧನೆ, ದೈವಾರಾಧನೆ, ಯಕ್ಷಾರಾಧನೆ ಶಾಕ್ತ ಆರಾಧನೆ ಮೂಲ ಸ್ವರೂಪ ಬುಡುದು ಪರತ್ ತೆರಿಯಂದಿಲೆಕ ಪೊಸತಾದ್ ಬದಲಾದ್ ಪೋತುಂಡು. ಮೂಲು ಬೆರ್ಮೆರ್ ಮಯಕಾದ್ ನಾಗನೊರುತ ಸುಬ್ರಹ್ಮಣ್ಯಗ್ ಆರಾಧನೆ ಸುರಾಂಡ್. ಒಂಜಿ ಪುಂಡಿ ಮಣ್ಣ್ – ನೀರ್ ದ ಒರುಟು ಬೆರ್ಮೆರ್(ಕೆಮ್ಮಲೆತ ಬೆರ್ಮೆರ್) ನಿಲೆಯಾಂಡ ಕುಕ್ಕೆಡ್ ಬೆರ್ಮ ಕುಮಾರನ ಬದಲ್ ಕುಮಾರೆ ಸುಬ್ರಹ್ಮಣ್ಯೆ ಆದ್, ನಾಗನ ಒರುಟು ಆರಾಧನೆ ನಡಪುಂಡು. ಕೋಟಿ ಚೆನ್ನಯೆರೆ ಕಾಲೊಡು ಬೆರ್ಮೆರೆ ಗುಂಡ ಇತ್ತುದ್ ಇನಿ ಅವ್ಲು ಸಿಮೆಂಟುದ ಗುಂಡ ಆದ್ ನಾಗಬ್ರಹ್ಮ ಆದ್ ವೈದಿಕ ವಿಧಿ ವಿಧಾನೊಡು ಆರಾಧನೆ ನಡತೊಂದುಂಡು. ಮೂಲ ಗುಂಡದ ಪುರಪು, ಪಿರಾಕುಲು ನನಲಾ ಅವ್ಲುಂಡು.

ಪಾಡ್ದನೊಲೆಡ್ ಲೆಕ್ಕೆಸಿರಿನ ಪುಟ್ಟುದ ಬಗ್ಗೆ ಓಲ್ಲಾ ಇಚಾರೊಲು ತಿಕ್ಕುಜಿ. ಸಿರಿನ್ ಯಕ್ಷಿಣಿ ಪಂದ್ ಪನ್ಪುನೆಡ್ದಾತ್ರ ಆಲ್ ಯಕ್ಷಮಾತೆ ಆದಿಪ್ಪೊಡುಂದು ಪನ್ಪೆರ್. ತುಳುನಾಡುಡ್ ಬಾರ್ಯಾತ್ ಮಾಸ್ತಿ ಕಲ್ಲುಲೆದ ಕೈತಲ್ ಲೆಕ್ಕೆಸಿರಿನ ಗುಡಿಕುಲು ಇಪ್ಪುವ. "ಕುಮಾರ" ಯಕ್ಷೆರೆಗ್ ಗಳಸುನ ಸವ್ದ. ಸಿರಿನ ಆರಾಧನೆಡ್ಲಾ ಸಿರಿನ ಮಗೆ ಆದ್ ಕುಮಾರೆ ತೋಜಿದ್ ಬರ್ಪೆ. ಸುಬ್ರಹ್ಮಣ್ಯೆ ಯಕ್ಷೆರೆ ಕುಮಾರೆಯಾದಿತ್ತುದ್ ಕಾಲಾನುಭಾಗೊಡು ಯಕ್ಷೆ ಮಯಕಾದ್ ಸುಬ್ರಹ್ಮಣ್ಯೆ ಒರಿತೆ. ಉಲ್ಲಾಲ್ದಿನೇ ದುರ್ಗಾಪರಮೇಶ್ವರಿ ಮಲ್ತುದ್ "ದುರ್ಗಾಪರಮೇಶ್ವರಿ ಉಲ್ಲಾಲ್ದಿ" ಪಂಡುದು ಇನಿಕಾನಗ ಉಲ್ಲಾಲ್ದಿ ಮಯಕಾದ್ ದುರ್ಗಾ ಪರಮೇಶ್ವರಿ ಒರಿನವೇ ಇಂಚ ಬದಲಾಯಿನೆಕ್ ಎಡ್ಡೆ ಉದಾರ್ಮೆ. ಕೋಟಿ ಚೆನ್ನಯೆರೆ ಕಾಲಘಟ್ಟೊಡ್ದು ದುಂಬೇ ಗರಡಿಲೆಡ್ ಬೆಮ್ಮೆರೆ ಮೂರ್ತಿಲು ಇತ್ತುದ್ ಕೋಟಿ ಚೆನ್ನಯೆರ್ ಕಾರ್ನಿಕ ಮೆರೆದ್ ಮಯಕ ಆಯಿ ಬೊಕ್ಕ ಗರಡಿಲೆಡ್ ಕೋಟಿ ಚೆನ್ನಯೆರೆ ಮೂರ್ತಿಲೆನ್ ತಾಪನೆ ಮಲ್ತೆರ್. ದುಂಬುಗು ಕೋಟಿ ಚೆನ್ನಯೆರೆಗ್ ಗರಡಿಲೆಡ್ ನೇಮ ಸುರಾಂಡ್. ಇನಿಕಾನಗ ತುಳುನಾಡುಡ್ 214 ರ್ದ್ ಮಿತ್ತ್ ಗರಡಿಲುಲ್ಲ. ಗರಡಿಲೆಡ್ ಗುಂಡದ ಉಲಯಿ ಬೆರ್ಮೆರೆ ಮೂರ್ತಿ ಇತ್ತುದ್ ಗುಂಡದ ಪಿದಯಿಡ್ ಅಂಚಿಂಚಿ ಕೋಟಿ ಚೆನ್ನಯೆರ್ನ ಮೂರ್ತಿಲಿಪ್ಪುಂಡು. ಗರಡಿ ಇದ್ಯೆದ ಸಾಧಕೆರೆಗ್ ಬೆರ್ಮೆರ್ ದೇವೆರಾದಿತ್ತುದ್ ಗರಡಿ ಇದ್ಯೆ ಕಲ್ತ್ ಪೋನಗ ಅಕ್ಲೆಗ್ ಬೆರಿ ಸಾಯಾದ್ ಸೈನಿಕ ದೈವ ಜುಮಾದಿನ್ ಕೊರೊಂತೆರ್. ಶಿವೆ ಬೊಕ್ಕದುರ್ಗೆ ತುಳುನಾಡ್ ಗ್ ಬತ್ತಿ ಬೊಕ್ಕ, ಅಕುಲೆ ಆರಾಧನೆ (ದೇವಿ) ಪುಗಾರ್ತೆಗ್ ಬನ್ನಗ ಬೆರ್ಮೆರ್ ನಿಧಾನವಾದ್ ಮದೆಕ್ ಸೇರೊಂದು ಪೋಯೆರ್. ದುಂಬುಗಡೆ ನಾಗೆ ಸೇರೊಂದು ನಾಗ ಬೆರ್ಮೆಯಾದ್, ಇನಿ ಆಲಡೆ, ಗರಡಿ, ಮೂಲಜನಾಂಗದ ಆರಾಧನೆದ ಜಾಗಲೆಡ್ ಬೆರ್ಮೆರ್ ತೋಜಿದ್ ಬರ್ಪೆರ್ ವಿನಃ ಒರಿನಂಚ ಬೆರ್ಮೆರ್ ಬ್ರಹ್ಮ ಆದ್, ಬೆರ್ಮೆರೆಗ್ ಆರಾಧನೆ ದಾಂತೆ ಆ ಜಾಗೆಡ್ ಬ್ರಹ್ಮಗ್ ಆರಾಧನೆ ನಡತೊಂದುಂಡು. ನಿಜವಾದ್ ನಾಗೆ ಬೇತೆನೆ, ಬೆರ್ಮೆ ಬೇತೆನೆಂದ್ ನಮ ತೆರಿಯೊನೊಡು . ನಾಗಬೆರ್ಮೆ ತುಳುನಾಡುಡ್ ಪುಗಾರ್ತೆ ಪಡೆದ್ ಇನಿಕನಾಗ ಅಲ್ತುಲಾ ಬೆರ್ಮೆ ಪೋದು ನಾಗೆ ಮಾತ್ರ ಒರಿದ್ ನಾಗಗ್ ನಾಗರಪಂಚೆಮಿ, ತಂಬಿಲ, ಆಶ್ಲೇಷ ಬಲಿ, ಡಕ್ಕೆ ಬಲಿ, ಬ್ರಹ್ಮಮಂಡಲ, ನಾಗಮಂಡಲ ಬತ್ತುದ್ ನಾಗಾರಾಧನೆ ತುಳುನಾಡುಡ್ ಬೆಳಗೆರೆ ಸುರಾದ್ ತುಳುನಾಡ ಉದಿಪುದ 'ಬೆರ್ಮೆರ್' ತುಳುನಾಡುಡ್ದ್ ಮದೆಕ್ ಸೇರೊಂದಿಪ್ಪುನವು ಭಾರಿ ಬೇಜಾರ್ದ ಸಂಗತಿ. ತುಳುವೆರೆ ನಾಗಾರಾದನೆದ ಬೇಸದ ತನು ದಾದಂದೆ ತುಳುವೆರೆಗಿನಿ ಗೊತ್ತುದಾಂತೆ ಪೋಂಡು.

ಅಡಿಪೋಯಿ ನಾಗೆ ಕೊಡಿಪೋಯಿ ಬೆರ್ಮೆರ್ ಪನ್ಪಿನವ್ಲು ಬೆರ್ಮೆರ್ ತುಳುವೆರೆ ದೇವೆರ್ಲಾ ಅಂದ್ ದೈವಲಾ ಅಂದುಂದ್ ನಂಕ್ ತೆರಿಯುಂಡು. ಪಂಚ ದೈವ ಸಾನೊಲೆಡ್ ಪ್ರಧಾನವಾದ್ ಬೆರ್ಮೆರ್ ಇತ್ತುದ್, ರಡ್ಡನೆ ಪ್ರಧಾನ ದೈವ ಆದ್ ನಾಗೆ ಇತ್ತುಂಡ್. ಬೆರ್ಮ ಸಾನೊಲೆಡ್ ಮೂಲ ತಾನ ಆದಿತ್ತಿನ ಕುಟುಮದ ನಂಬೊಂದು ಬತ್ತಿನ ಒಂಜಾತ್ ದೈವೊಲಿತ್ತ. ಬೆರ್ಮೆರೆ ಸಾನೊಲು ಎಂಚ ಆಲಡೆಯಾಂಡ್, ಎಂಚ ನಾಗಬೆರ್ಮ ಸಾನ ಆಂಡುಂದ್ ತೆರಿಯೊನುಗ. ಒಂಜಾತ್ ಮರ ಮಟ್ಟ್, ಪುದೆಲ್, ಬನೊಕುಲು ಇತ್ತಿನ ಇಡೆ ಆಲಡೆ ಆಂಡುಂದ್ ಪೆರಿಯ ಜನಪದ ವಿದ್ವಾಂಸೆರಾಯಿನ ಕೆ.ಎಲ್.ಕುಂಡಂತಾಯೆರ್ ಪನ್ಪೆರ್. ಆರ್ ನನಾತ್ ಬೆರ್ಮೆರೆ ಇಚಾರ ಪಂಡುದು, ಆಲಡೆ ಬಾರೀ ಪಿರಾಕುದ ಪನ್ಪುನೆಕ್ ಸಿರಿನ ಪುಟ್ಟುಗಾದ್ ಬೆರ್ಮೆರೆಗ್ ಸತ್ಯನಾಪುರದ ಅಜ್ಜೆರ್ ಮೂಲ ಆಲಡೆದ ಜೀರ್ಣೋದ್ಧಾರ ಮಲ್ಪುವೆರುಂದ್ ಪನ್ಪುನ ಇಚಾರೊನು ಪಾರ್ದನ ಪನ್ಪುಂಡುಂದು ಪಂಡೆರ್. ಸಂಸ್ಕೃತದ ಬ್ರಹ್ಮ ಸಬ್ದೊರ್ದು ಅಪಭ್ರಂಶ ಆದ್ ಬತ್ತುನವು ಬೆರ್ಮೆರ್ ಅತ್ತ್. ತುಳುವೆರೆಗ್ ಬ್ರಹ್ಮ ಪನ್ಪಿ ದ್ವಿತ್ವಾಕ್ಷರ ಪನೆರೆ ತೆರಿಯಂದೆ ಬೆರ್ಮೆರ್ ಪಂದ್ ಲೆತ್ತೆರುಂದ್ ಒಂಜಿ ವಾದ ಇತ್ತುಂಡ ಅವ್ ತಪ್ಪು. ದಾಯೆ ಪಂಡ ತುಳುನಾಡುಗ್ ವೈದಿಕ ಸಂಸ್ಕೃತಿದೊಟ್ಟಿಗೆ ಬತ್ತಿನ ಸಂಸ್ಕೃತ ಬರ್ಪುನ ದುಂಬೇ ತುಳುನಾಡುಡ್ ಬೆರ್ಮೆರ್ ಇತ್ತೆರ್. ಕಾಲ ಕರಿಲೆಕ ಸಿರಿನ ಆರಾಧನೆದ ಅಗತ್ಯ ಬೂರ್ನಗ, ಅಕ್ಲೆ ಕುಟುಮದ ಮೂಲಸಾನ ಆಯಿನ ಬೆರ್ಮಸ್ಥಾನೊಡು ಸಿರಿನಕ್ಲೆಗ್ ಆರಾಧನೆ ಮಲ್ತೊಂದು ಬತ್ತೆರ್. ಅವೆರ್ದ್ ಬೊಕ್ಕ ಸಿರಿಕುಲು ಇತ್ತಿನ ಬೆರ್ಮಸ್ಥಾನೊಲು ಆಲಡೆಲಾಯ. ಬೆರ್ಮಸಾನದ ಪುದರ್ ನಿದಾನವಾದ್ ಮಾಜೊಂದು ಪೋಂಡು. ಆಲಡೆಲು ಪಂಡುದ್ ಆಂಡ್. ನಮ ಮದತುದ್, ತೆರಿಯಂದಿನೆನ್ ಗೊತ್ತಿಜ್ಜಂದಿನೆನ್ ನಮಕ್ ಸಮಸ್ಯೆ ಬನ್ನಗ ತೆರಿನಕ್ಲೆಡ ಕೇನರೆ ಪೋಯ. ಪನ್ಪುನಕ್ಲೆಗ್ ನಮ್ಮ ಬೆರ್ಮೆರ್ ಏರುಂದೇ ಗೊತ್ತಿಜ್ಜಂದೆ ಅಕ್ಲೆಗ್ ತೆರಿನ ಚತುರ್ಮುಖ ಬ್ರಹ್ಮನ್, ಕಪಾಲ ಬ್ರಹ್ಮನ್ 'ಬ್ರಹ್ಮ' ಪಂದ್ ಕೇಂಡಿನಕ್ಲೆಗ್ ತೆರಿಪಾಯೆರ್. ಅಂಚ ಆದ್ ಲಿಂಗ ರೂಪದ ಬೆರ್ಮತಾನೊಲು ಪೂರ ದೇವಸ್ಥಾನೊಲಾವೊಂದು ಪೋಯ. ಬೆರ್ಮ ಸಾನೊಡು ರಡ್ಡನೆ ಪ್ರಧಾನ ದೈವ ಆದಿತ್ತಿನ ನಾಗೆ, ಆಯೆ ಅಕ್ಲೆಗ್ ತೆರಿನೆಡ್ದಾತ್ರ, ತನ್ನ ಸಮಸ್ಯೆದ ಬಗೆಟ್ ಏರಾಂಡಲ ಕೇನರೆ ಪೋಯೆರ್ಡ ಅಕ್ಲೆಗ್ ಅಕುಲು ಬೆರ್ಮೆರೆ ಬಗೆಟ್ ತೆರಿಪಾವಂದೆ, ನಾಗನ ಬಗೆಟೇ ತೆರಿಪಾವೊಂದು ಪೋಯೆರ್. ಅಪಗ ಬೆರ್ಮೆರ್ ರಡ್ಡನೇ ಜಾಗೆಗ್ ಸೇರ್ದ್, ಬೆರ್ಮ ಪೋದು ನಾಗಬೆರ್ಮೆರ್ ಮಾತ್ರ ಉದಿತುದ್ ತೋಜ್ಯೆರ್. ಬೆರ್ಮೆರೆ ಸಾನೊಲು, ನಾಗಬೆರ್ಮೆರೆ ಸಾನೊಲು ದೇವಸ್ಥಾನೊಲಾವೊಂದು ಪೋಯ. ನಾಗನೊಟ್ಟುಗು ಸಮೀಕರಣ ಮಲ್ತುದು ನಾಗ ದುಗ್ಗಮ್ಮ, ನಾಗ ಸುಬ್ರಹ್ಮಣ್ಯ, ನಾಗಬೆರ್ಮೆರುಂದ್ ಪೂರ ಮಲ್ತೆರ್. ಬೆರ್ಮೆರ್ ನಾಗನೊಟ್ಟುಗು ಸೇರ್ದ್ ನಾಗಬೆರ್ಮೆರಾಯೆರ್. ಮೂಲು ಬೆರ್ಮೆರೇ ಪ್ರಧಾನ, ನಾಗೆ ಉಪದೈವ. ನಾಗಬ್ರಹ್ಮ ಇತ್ತೆ ಪೂರಾ ತಿಕುಡ್ ತೂಯೆರೆ ತಿಕ್ಕುನಿ. ಬೆರ್ಮೆರ್ ತುಳುವೆರೆ ದೇವೆರ್, ಬೆರ್ಮಸಾನ ತುಳುವೆರೆ ದೇವಸಾನಂದ್ ಸ್ಥಳ ನಾಮ ಸಂಶೋಧಕೆರ್ ಪನ್ಪೆರ್. ಬೆರ್ಮೆರೆನ್, ಬಿರ್ಮೆರೆನ್, ಬಿಮ್ಮೆರೆನ್ ಸೂಕ್ಷ್ಮವಾದ್ ತೂಂಡ ಆರ್ ಅಮ್ಮೆರ್, ಮಲ್ಲಮ್ಮೆರುಂದಾಯ್ಜ? ಅಂಚಾದ್ ಬೆರ್ಮೆರ್ ತುಳುವೆರೆ ದೇವೆರ್.

ತುಳುನಾಡ ತುಳುವೆರೆ ಕುಲದೈವ ಆದ್ ಆದಿ ಆಲಡೆಡ್ ತನ್ನೊಟ್ಟುಗು ಉಂಡಾಯಿ ಸಗ್ತಿಲೆನ್ ಪರಿವಾರ ಸಗ್ತಿಲಾದ್ ಮಲ್ತೊಂದು, ತುಳುವೆರೆ ಮಿತ್ತ ಅಧಿಕಾರ ಪಡೆಯಿನ, ದೇಬೆರ್ಲಾ ಅಂದ್ ದೈವಲಾ ಅಂದ್ ಪನ್ಪಾಯಿನ ಬೆರ್ಮೆರ್ನ ಬಗೆಟ್ ಈತ್ ಪರಪು ಪುರಪುಲುಪ್ಪುನಗ ನಮ ಅರೆನ್ ಮದತುದ ಪಂಡ ನಮ ಒತ್ತೊನ್ನ ತುಳು ಆರಾಧನಾ ಸಂಸ್ಕೃತಿನೇ ಮದತುದ ಪಂಡುದರ್ಥ. ಇಂಚನೇ ನಮ ನಮ್ಮ ಮೂಲ ನಾಗಾರಾಧನೆ, ಬೆರ್ಮೆರೆ ಆರಾಧನೆ, ದೈವಾರಾಧನೆನ್ ಮದತುದ್ ಪೊಸ ಸಂಸ್ಕೃತಿದ,ಸಂಸ್ಕೃತದ ಪೂಜೆ ಪುರಸ್ಕಾರೊಲೆನೇ ಮಂತೊಂದು ಪೋಂಡ ನಮ್ಮ ಆರಾಧನಾ ಸಂಸ್ಕೃತಿ ದುಂಬುದ ತರೆ ತರವಾಡುಗ್ ಎಂಚ ದುಂಬೊತ್ತೊಂದು ಪೋವು ಪನ್ಪುನೆನ್ ಒರ ಉಂತುದು ನಮ ಯೋಚನೆ ಮಲ್ಪೊಡು. ತುಳುನಾಡ ಬೆರ್ಮೆರ್ ತುಳುವೆರೆ ಆರಾಧ್ಯ ದೈವ ಆದ್ ಇನಿಕ್ಲಾ ಕೆಲವು ಕೋಡಿಡ್ ಒರಿದೆರ್ ಪಂಡ ನಮ್ಮ ಪುಣ್ಯಂದೇ ಪನೊಡಾತೆ. "ಪಾಣಾರಾಟೊಡು" ನಡಪುನ "ಸ್ವಾಮಿ ಕೋಲ" ನೇ ಬೆರ್ಮೆರೆ ಆರಾಧನೆನ್ ಇನಿಕ್ಲಾ ನಮಕ್ ನೆಂಪು ಪುಟ್ಟಾವೊಂದುಂಡು. "ಸ್ವಾಮಿ" ಪಂಡ ಬೆರ್ಮೆರುಂದು ಇನಿ ಮೂಲು ಕೋಲ ಮಲ್ಪವುನಕ್ಲೆಗ್ಲಾ, ಚಾಕಿರಿದಕ್ಲೆಗ್ಲಾ, ಕಟ್ಟುನಕ್ಲೆಗ್ಲಾ ತೆರಿಯಂದೆ ಪೋಯಿನವು ಬಾರೀ ಬೇಜಾರ್ದ ಸಂಗತಿ. ಕುಂದಾಪುರ ಮಾರಣಕಟ್ಟೆದಂಚಿ ಸ್ವಾಮಿ ಕೋಲ ನಡಪುಂಡು.ಮೂಲ ಜನಾಂಗದಕುಲು ಬೆರ್ಮೆರೆಗ್ ಕಟ್ಟುವೆರ್.ಅಂಚನೆ ನೂಲು ಪಾಡಿ ಸಂಸಾರ ಬೆರ್ಮೆರೆಗ್ ವಸಯೊಗು ಉಂತ್ಂಡ ಅಕ್ಲೆ ಮೇಲೆಡ್ ನಾಗೆ ವಸಯಾವು ವಿನಃ ಬೆಮ್ಮೆರೆ ವಸಯಾಪುಜಿ. ಆಟಿ ಕಳಂಜೆ ಮಾಯಂತರಸುನ ಮಗೆಂದ್ ಬರ್ಪುಂಡು. ಮಾಯಾವಿಲು ಪಂಡ ಯಕ್ಷೆರ್. ಆಟಿ ಕಳೆಂಜನ ಅಮ್ಮೆರ್ "ಬಿರ್ಮಾರು" ಪಂಡ "ಬೆರ್ಮೆರ್", ಆಟಿ ಕಳೆಂಜನ ಸೃಷ್ಟಿಲಾ ಬೆರ್ಮೆರೆಡ್ದ್ ಆಂಡುಂದ್ ಕೆಲವೆರ್ನ ಅಭಿಪ್ರಾಯ. ಬೋಳ್ತೇರ್(ಬೆಳ್ತಂಗಡಿ)ದಂಚಿ ಬರ್ಪುನ ಜೋಡಿ ಕಳೆಂಜೆರೆನ್ "ಬಿರ್ಮೆರೆ ಮಾಣಿಲು" ಪಂದ್ ಪನ್ಪೆರ್. ಬಂಟೆರ್ ಅಗೆಲ್ ಪಾಡ್ನಗ ಜೈನ ಅಗೆಲುಂದ್ (ನಟ್ಟಿಕಾಯಿದ,ಕಾಯಿ ಕಜಿಪುದ ಅಗೆಲ್) ಪಾಡ್ವೆರ್. ಉಂದು ಬೆರ್ಮೆರೆಗ್ ಬಲಸುನ ಅಗೆಲುಂದು ಎರಿಯಾಕ್ಲು ಪನ್ಪೆರ್. ಅಗೆಲುಡ್ ಬೆರ್ಮೆರೆಗ್ ಪೇರ್ ದೀಪೆರ್. ನಾಗಾರಾಧನೆ, ದೈವಾರಾಧನೆ, ಯಕ್ಷಾರಾಧನೆ, ಜಲ, ಅಗ್ನಿ, ಪ್ರಕೃತಿ ಇಂಚ ಮಾತೆಕ್ಲಾ ಸೇರಿಗೆಯಾದಿಪ್ಪುನ ಬೆರ್ಮೆರೆನ್ ಇರೆ ಮದೆರ್ದ್ ಪಿರ ಲೆತೊಂದು ಬತ್ತುದ್ ಆರಾಧನೆ ಕೊರ್ಪುನ ಜವಾಬ್ದಾರಿ ತುಳುವೆರೆಗುಂಡು. ಇಡೀ ತುಳುನಾಡುದ ಉದಿಪುಗು, ಆರಾಧನೆಗ್ ಏನಿದ ಕಾಲೊಡ್ದು ಬೆರಿ ಎಲುವಾದ್ ಆರಾಧನೆದೊರುಟು ತುಳುವೆರೆ ಸಮ್ಮಂದೊಲೆನ್ ಗಟ್ಟಿ ಮಲ್ತಿನ ಬೆಮ್ಮೆರೆನ್ ನನ ಕುಡೊರ ಆರಾಧನೆ ಮಲ್ಪೆರೆ ಸುರು ಮಲ್ಪೊಡು. ಬೆರ್ಮೆರ್ ಇತ್ತೆರ್ಡ ದೈವೊಲುಲ್ಲೆರ್, ಬೆರ್ಮೆರಿತ್ತೆರ್ಡ ಯಕ್ಷೆರುಲ್ಲೆರ್, ಬೆರ್ಮೆರಿತ್ತೆರ್ಡ ನಾಗೆರುಲ್ಲೆರ್. ಅಂಚಾದ್ ನಾಗ, ಯಕ್ಷ, ದೈವೊಲೆನ ಮೂಲ ಗುರ್ಕಾರೆ ಆಯಿನ ಬೆಮ್ಮೆರೆನ್ ನಮ ತುಳುವೆರೆ ಪೆರಿಯಮ್ಮೆಂದ್ ದುಂಬುಗು ಆರಾಧನೆ ಮಲ್ಪುಗ.

ಮಹೇಂದ್ರನಾಥ್ ಸಾಲೆತ್