Google

ICHARO

YEDDE PATHERA
Naramaniyagh ovven Kalpane malppere sadiyoundo.. Aven Padeyarala Sadhya undu.

ತಲವು ಲಪ್ಪುನು

 ಉಂದೊಂಜಿ ಬಾರಿ ಮಲ್ಲ ಸಾಪ, ತುಲುವೆರೆನ: "ಆಯಗ್/ಆಲೆಗ್ ತಲವು ಲಪ್ಪರೆ". ಕೊರಿನ ಅರಿ ಬಾರಾ, ದೊಡ್ಡಾ, ಪಿರ ಕೊರ್ಜೆರ್ ಡ, ಅತ್ತ್ ಡ ಕೊರಿನ ಪಡಿ (ಸಂಬಲ) ಕ್ ಸರಿಯಾಯಿನ ಬೇಲೆ ಬೆಂದ್ ಜೆರ್ಡ "ಆಯಗ್ ತಲವು ಲಪ್ಪರೆ ಆಂಡ್" ಇಂಚ ಮುರಿಯ ದೀವೊಂದು ಇತ್ತ. ಅಪಗಂಡಾ ಇ ತಲವು ಪಂಡ ದಾದ? 
      ತಲವು ಪಂಡ ಸೂತಿಗ. ತಲವು ಕಲೆಪಿನ ಬೊಜ್ಜ (ಸುದ್ದ)ದ ಕೆಲಸ ಮಲ್ತಿನ ಮಡ್ಡೆಲಗ್ ಕೊರ್ಪಿನ ಪಡಿ (ಸಂಬಲ)ನ್ ಲಪ್ಪುನೈವೆನ್ (ಮಾಪುನು, measuring) 'ತಲವು ಲಪ್ಪುನು' ಪನ್ಪೆರ್. ಬವುಸ ದುಂಬುಡು ಕಿಲೇಸಿಗ್ ಲಾ 'ತಲವು ಲತ್ತ್ ದ್' ಕೊರೊಂದು ಇತ್ತೆರ್. ಸುಡಲೆಗ್ ನುಪ್ಪು ಪಾಡ್ದ್, ಜಾಲ್ ಗ್ ಬತ್ತ್ ದ್, ತೆಂಕಾಯ ಬಡಕಾಯ (ದಕ್ಷಿಣೋತ್ತರವಾಗಿ) ಪಜೆ ಬುಡ್ಪ ಪಾಡ್ ದ್, ಪಜೆತ ಕೊಡಿಟ್, ನಡುಟು, ಕಡೆಟ್ ಮೂಜಿ ಮೂಜಿ ಸರ್ತಿ ಬಾರ್ ದೊರ್ಪುನು (ಕುರುವೆಡ್ದ್). ದುಂಬುಡು ಕಲಸೆಡ್ದ್ ಬಾರ್ ದೊರ್ಪುನು ಪಂದ್ ಕೇಂದಿನ ನಿನೆಪು. ದಾಯೆಗ್ ಪಂಡ ಲಪ್ಪರೆ (to measure) ಸೇರ್, ಕಲಸೆದಂಚಿನ ಲಪ್ಪು (measuring device) ಬೋಡು. ಅಂಚ ಪಾಡಿನ ಬಾರ್ ನ್ ಮಡ್ಡೆಲೆ ಪಸೊಂದು ಪೋಪಿನಿ. ತುಲುವೆರೆಡ್ ಅಮೆ ಸೂತಿಕದ ಸುದ್ದ ಮಲ್ಪುನು ಮಡ್ಡೆಲೆರ್. ಅಪಗಾಂಡ 'ಪಡಿ ಲಪ್ಪುನು' ಉಂದು ಸಾಪ ಎಂಚ ಆಪುಂಡು? 
     ನಮ ಏರೆಗ್ಲಾ ಕೊರಿನ ಅರಿ ಬಾರ್, ದೊಡ್ಡು ಕಾಸ್ ಪಿರ ಬತ್ತ್ ಜಿಡ, ಅವ್ವೆನ್ ಗೆತೊಂದಿನ ನರಮಾನಿನ 'ತಲವು ಲಪ್ಪರೆ' ಗ್ ಆವಡ್ ಪಂದ್ ಸಾಪಿನು. ಐತ ಅರ್ತ್ ಗೆತೊಂದಿನಾಯೆ/ ಆಲ್ ಸೈಯ್ತ್ ದ್ ಪೋವಡ್ ಪಂದ್ ಬಯಕುನು.
     ತಲವು ಲತ್ತಿ ಬೊಕ್ಕ, ಬಚ್ಚಿರೆ ಬಜ್ಜೆಯಿ ಪಗಪರೆ ಉಂಡು. ಪಜೆನ್ ಮುಡಾಯಿ ಪಡ್ಡಾಯಿ ಪಾಡ್ದ್, ಐತ ಮಿತ್ತ್ ಉಂತುದು ಕಿರಿಯ ಪತಿನಾಯೆ ಪರವೂರ್ದ ಅತ್ತ್ ಡ ಊರ್ದ ಹಿರಿಯೆರ್ ಒರಿಯಡ 'ಬುಡಿ ತರೆ ಕಟ್ಟಾದ್ ಕೊರೊಡು' ಪಂದ್ ಬಚ್ಚಿರೆ ಬಜ್ಜೆಯಿ ಕೊರ್ದ್ ಬಿನ್ನಯ ಮಲ್ಪುವೆ (ಕೇನೊಂಬೆ). ಆ ಹಿರಿಯೆರ್, ಕಿರಿಯ ಪತಿನಾಯಡ ಬಚ್ಚಿರೆ ಬಜ್ಜೆಯಿ ಪಗತೊಂದು 'ನಮ ಸಂತಾನ ಸಂತೇಸಿಗ್ ಬೊಡ್ಚಿ' ಪಂದ್ ಪನ್ಪೆರ್. ಇಂಚ ಮುಕ್ಕೊಲು ಮುಕ್ಕೊಲು ಪನ್ಪೆರ್. ನಮನ ಸಂತಾನ ಸಂತೇಸಿಡ್ ಸಾವು ಬತ್ತ್ಂಡ, ಬೊಜ್ಜದಾನಿ ಪೊಂಜೋವು ತರೆ ಬುಡ್ದ್, ಚಂಡಿ ಕುಂಟುಡು ಉಂತುವೆರ್. ಆನ್ ಬಾಲೆಲು ತರೆಗೀಸ್ ದ್ ಇಪ್ಪುವೆರ್, ದೂಲಪ್ಪದಾನಿ. ಬೊಜ್ದದಾನಿ ಮುರ್ಕು ಮೀದ್, ಚಂಡಿ ಕುಂಟುಡು ಉಂತುವೆರ್. ನಮನ ಸಂತೇಸಿ ಸಂತಾನೊಗು ಇ ಪರಿಸ್ಥಿತಿ ಬರ್ಪಿನಿ ಬೊಡ್ಚಿ ಪನ್ಪಿನ ಎಡ್ಡೆಪ್ಪುನು ಬಯಕ್ ದ್, ಬುಡಿ ತರೆ ಕಟ್ಟರೆ, ಶೋಕಾಚರಣೆ ಕೈದ್ ಮಲ್ಪೆರ್ ಅಪ್ಪನೆ ಕೊರ್ಪೆರ್ ಮಾತ ಊರ್ದಗಲೆನ, ಪರವೂರ್ ದಗಲೆನ, ಪೊದ್ದೆರೆನ, ಇಷ್ಟೆರೆನ ಪರವಾದ್.
     ಆಯನ/ಆಲೆನ 'ತಲವು ಲಪ್ಪರೆ ಆಂಡ್', ಅಂಚೆನೆ ಆಯನ 'ಮೇಲ್ ಗ್ ಪಾಡರೆ ಆಂಡ್' ಪಂದ್ ಲಾ ಒಂಜಿ ಸಾಪ ದೀಪಿನಿ. ಆ ಆಯನ/ ಆಲೆನ ಪುನತ ಮೇಲ್ ಗ್ ಪಾಡುನ ಬೊಲ್ದು ಕುಂಟುಗು ಪಂದ್ ಅರ್ತ. ಆಯನ 'ತಿಗಲೆಗ್ ದೀಂಡ್', 'ಸುಡಲೆಗ್ ಪಾಡರೆ', 'ಪುಲ್ಲೇಲ್ ಗ್' 'ಮರೇಡುನು' ಉಂದು ಪೂರ ಒರಿಯನ ಸಾವುನ ಬಯಕುನ ಸಾಪೊಲು. ಅಂಚೆನೆ ಪೊಂಜೋವೆಗ್ ಆಲೆನ ಕಂಡನೆ ಸೈತ್ ಪೋವಡ್ ಪಂದ್ ಸಾಪಿವುನ ನೆರಡೆ ನೆಟೆ ಪನರೆ ಸರಿ ಆಪುಜಿ. (010123)

✍️ ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ
Share on :

SUDDI

 

Copyright © 2011 Tulu World - All Rights Reserved