ತೆನಸೇ ಮರ್ದ್ - ಕುಡುಅರಿ ( ಹುರುಳಿ )

ಕುಡು ತುಳುವೆರೆನ ರಡ್ದನೇ ಅರಿ ಅಂಚಾದೇ  ಕುಡುನು ಕುಡುಅರಿ ಪಂಡ್‌ದ್ ಲೆಪ್ಪುವೆರ್. ಅರಿ ಪಂಡ ಜೀವಸತ್ವ ಇತ್ತಿನವು, ಅವು ಇಜ್ಯಾಂದೆ ಬದ್ಕೆರೆ ಬಲ್ಲಿ ಪಂಡ್ದ್ ಅರ್ಥ.

ದಿನಲಾ ನಿಯಮಿತವಾದ್ ಕುಡುನ್ ತಿನ್ಪುನ  ಅಂಚನೆ ಬಳಕೆ ಮಲ್ಪುನಗ ಮಸ್ತ್ ಲಾಬೊಲು ಉಂಡು. ಆಯುರ್ವೇದೊಡುಲಾ ಉಂದು ಉಲ್ಲೇಖ ಉಂಡು, ಬೊಕ್ಕ ಉಂದೆನ್ ಸೇವನೆ ಮಲ್ಪುನಗ ಬೇತೆ ಬೇತೆ ಸೀಕ್ ಲೆನ್ ತಡೆಯೆರೆ ಸಾಧ್ಯೊ ಆಪುಂಡು. 

ನಮ ನಮ್ಮ ತಿನಸ್ - ಆಹಾರೊಡು ಮಸ್ತ್ ಬಗೆತ ಧಾನ್ಯೊಲೆನ್ ಸೇವನೆ ಮಲ್ಪುನವು ಸಹಜ. ಉಂದೆಟ್ ಉಪ್ಪುನ ಪೋಷಕಾಂಶೊಲು ಶರೀರೊಗು ಬಾರಿ ಎಡ್ಡೆ ಮಾತ್ರ ಅತ್ತಂದೆ ಸೀಕ್‌ರ್ದ್‌ಲಾ ರಕ್ಷಣೆ ಕೊರ್ಪುಂಡು. ಕೆಲವು ನಿರ್ದಿಷ್ಟವಾಯಿನ ಧಾನ್ಯೊಲೆನ್  ಪವಾಡದ ತಿನಸ್ ಪಂಡ್ದ್ ಲೆಪ್ಪುವೆರ್. ಅಂಚಿನ ಒಂಜಿ ಧಾನ್ಯ ಪಂಡ ಕುಡು. ಅಂಚಾದೇ ದುಂಬುದ ಕಾಲೋಡು ದೈವ ದೇಬೆರೆ ಸಾನೊಲೆಡ್ ಕುಡುನು ಪ್ರಸಾದವಾದ್ ಕೊರೊಂದಿತ್ತೆರ್. 

ಆಯುರ್ವೇದದ ಪ್ರಕಾರ ಕುಡುಟು ಕನೆರ್ ರಸ ಉಪ್ಪುಂಡು, ಉಂದೆನ್ ತಿಂದಿ ಬುಕ್ಕೊ ಪುಳಿ ರುಚಿ ಬರ್ಪುಂಡು. ಉಂದು ಶರೀರೊಡು ಉಷ್ಣೊನು ಸೃಷ್ಟಿ ಮಲ್ಪುಂಡು. ಕಫ ಬೊಕ್ಕ ವಾತನ್ ಕಮ್ಮಿ ಮಲ್ಪುಂಡು ಬೊಕ್ಕ ಪಿತ್ತ ಬೊಕ್ಕ ನೆತ್ತರ್ ವರ್ಧನೆ ಮಲ್ಪುಂಡು. ಕುಡುಟು ಪ್ರೋಟೀನ್ ಬೊಕ್ಕ ಪೋಷಕಾಂಶೊಲು ಎಚ್ಚ ಉಪ್ಪುಂಡು, ಬೊಕ್ಕ ಬೆಂದ್ ದ್  ಬಚ್ಚಿದ್ ಉಪ್ಪುನಕುಲು ಉಂದೆನ್ ಸೇವನೆ ಮಲ್ತ್ಂಡ ಬಚ್ಚೆಲ್ ಕಮ್ಮಿ ಆಪುಂಡು.

• ಉಂದೆನ್ ಆಯುರ್ವೇದೊಡು ಅಸ್ಮರಿ ಛೇದಕ ಪನ್ಪೆರ್. ಮೂತ್ರಪಿಂಡದ ಕಲ್ಲುಲೆನ್ ರಟ್ಟಾವುಂಡು.
• ಕುಡುಅರಿ ಸೇವನೆ ಮಲ್ತುಂಡ ಶರೀರ ಗಟ್ಟಿ ಆಪುಂಡು.
• ವಾತನ್ ಒಂಜೇ ದಿಕ್ಕ್ ಗ್ ಕನಪುಂಡು, ಉಂದೆಡ್ದ್ ಮಲಬದ್ಧತೆ ಕಮ್ಮಿ ಆಪುಂಡು.
• ಉಂದು ಗಂಟು ಮುಟ್ಟುಲೆನ್ ಗಟ್ಟಿ ಮಲ್ಪುಂಡು.
• ಉಂದು ಕಣ್ಣ್ ದೃಷ್ಟಿಗ್ಲಾ ಎಡ್ಡೆ. ದೂರದೃಷ್ಟಿ ಬೊಕ್ಕ ಸಮೀಪದೃಷ್ಟಿನ್ ಸರಿ ಮಲ್ಪೊಂಡು. ಉಂದೆತ ಒಟ್ಟುಗು, ಸೊಪ್ಪು ತರಕಾರಿ ಬೊಕ್ಕ ವಿಟಮಿನ್ ಎ ಡ್ ಸಮೃದ್ಧವಾದ್ ಉಪ್ಪುನ ಆಹಾರೊಲೆನ್ ಸೇವನೆ ಮಲ್ತ್ಂಡ ಜೀರ್ಣಾಂಗ ವ್ಯವಸ್ಥೆ ಸುಧಾರಣೆ ಆಪುಂಡು.
• ನೆತ್ತೆರ್ ಡ್ ಸಕ್ಕರೆದ ಮಟ್ಟೊನು ಕಮ್ಮಿ ಮಲ್ಪುಂಡು.
• ಬೊಕ್ಕ  ಇನ್ಸುಲಿನ್ ಪ್ರತಿರೋಧೊನು ಕಮ್ಮಿ ಮಲ್ಪುಂಡು. ಉಂದು  ನೆತ್ತೆರ್ದ ಚೀಪೆದ ಮಟ್ಟೊನು ನಿಯಂತ್ರಣ ಮಲ್ಪೆರೆ ಸಹಾಯ ಮಲ್ಪುಂಡು.
• ಕೊಲೆಸ್ಟ್ರಾಲ್ ಮಟ್ಟೊನು ಕಮ್ಮಿ ಮಲ್ಪೆರೆ ಸಹಾಯ ಮಲ್ಪುಂಡು ದಾರಾಳ ಫೈಬರ್ ಉಪ್ಪುಂಡು, ಉಂದು ನೆತ್ತೆರ್ದ ಬೊರ್ಚಾಂದಿ ಕೊಲೆಸ್ಟ್ರಾಲ್ ನ್ ನಿಯಂತ್ರಣ ಮಲ್ಪೆರೆ ಸಹಾಯ ಮಲ್ಪುಂಡು. ಉಂದು ಹೃದಯದ ನಾಳೊಲೆಡ್  ಉಪ್ಪುನ ಬೊರ್ಚಾಂದಿ ಕೊಲೆಸ್ಟ್ರಾಲ್ ನ್ ದೂರ ಮಲ್ಪುಂಡು ಬೊಕ್ಕ ಅಡಚಣೆದ ಅಪಾಯೊನು ಕಮ್ಮಿ ಮಲ್ಪುಂಡು. ಕುಡುಅರಿನ್ ನೆನೆತ್ ದೀದ್ ಮುಂಗೆ ಬರ್ಪಾದ್ ತಿಂದ್ಂಡ ಬುಕ್ಕಲ ಎಡ್ಡೆ.