ದೇವೆರ್ ಉದಿಯ ಬೆಂದಿನ (ಸಿಸ್ಟಿ ಮಲ್ತಿನ) ಸುರುತ ನರಮಾನಿ ಆದಂ (ಸರೀ ಓದುಲೇ, ಅಧಮ ಅತ್ತ್). ಆಂಡ್, ಇ ಆದಮು ಬಾರಿ ಕುಸಿಟ್ ದಿನ ಗೆತ್ತೊಂದು ಇತ್ತೆ. ಕೋರಿ ಕಿಲೆಪುಗು ಲಕಿಯೆ, ಕುಕ್ಕುದಿರೆಟ್ ಕೂಲಿ ದೆಕ್ದ್, ಮೈನೀರ್ ಮೈತ್ದ್, ಬಾಯಿ ಮುಕುಲಿಯೆ, ಗರಕ್ಕೆನೆ ಮೋನೆ ದೆಕ್ದ್, ಕುಕ್ಕು, ಪೆಜಾಕಾಯಿ…ಸಾರತ್ತೊಂಜಿ ಪಲವಸ್ತ್, ಅತ್ತ್ ಡ ಕಿರೆಂಗ್, ಕೇನೆದ ಕಂಡೆ, ಮರ ಕಿರೆಂಗ್ ಇಂಚಿತ್ತಿನ ಏತೋ ಮಾತ ಕಂಡೆಲೆನ್ ತಿಂದೆ. ನಮ ಇ ಪ್ರಕೃತಿದ ದುನಿಪು (music) ಕೇನೊಂದು ಮೆಯಿ ಮರ್ಲೊಂದು ಇತ್ತೆ. ಬರ್ಸ ಬರ್ನಗ ತರೇಕ್ ನೀರ್ ಬೂರಿಯರೆ ಬಲ್ಲಿ ಪಂದ್ ಒಂಜಿ ಎಲ್ಯ್ ಇರೆಕ್ಲೆನ ಮಾಡ್ (ಪರ್ಣಕುಟಿ) ಮಲ್ತ್ದ್, ಪಗೆಲ್ಡ್ ಐತ ಅಡಿಟ್ ತಿಂದ್ ಉಂಡ್ದ್ ಜೆತ್ತ್ ದ್, ಲಕ್ಕ್ದ್ ಬಾರಿ ಕುಸಿಟ್ ಇತ್ತೆ. ದೆಂಬರಪ, ಗಾಲಿ ಬೀಜ, ಕಾಡೊರ್ಮೆ ಬಲಿ ಬರೊಂದು ಇತ್ತೆ. ನಾಲ್ ಸುತ್ತ ಕಾಡ ಮುರ್ಗೊಲೆನ ಪೋಡಿಗೆ ಇಜ್ಜಿ, ಐಕ್ಲೆಗ್ ನರಮಾನಿನ್ ತಿನರೆ ಆಪುಂಡು ಪಂದ್ ಗೊತ್ತು ಇತುಜಿ, ಉಚ್ಚುಲೆಗ್, ನರಮಾನಿಗ್ ಕೊಡಪುನ ಅಗತ್ಯ ಇತುಜಿ, ಕಾಯಿಲೆ ಕಸಾಲೆ…ಲೋಕೊಗು ಗೊತ್ತು ಇತುಜಿ.
ದೊಂಡೆದ ಪಸೆ ಆಜಿನಗ ತೋಡುಡು ಪರಪು ನೀರ್ದ ನಾಲ್ ಮುಕುಲಿ ಪರಿಯೆ, ಕಾಡ ಪರ್ಂದುಲು…ಚೂರಿ ಮುಲ್ಲುದ ಪರ್ಂದ್, ಕುಂಟಾಲ್ದ ಪರ್ಂದ್, ಕರ್ಂಡೆ, ಕೇಪುಲ ಪರ್ಂದ್,.....ಪಂದ್ ಪಿರೆಜನ ಇಜ್ಜಿ ಸಾರತ್ತೊಂಜಿ ಪರ್ಂದ್ಲೆನ್ ತಿಂದೆ. ಮೆಯಿತ ಕುರೆಕ್ ಪರಪು ನೀರ್ಡ್ ಮೆಯಿ ದೆಕ್ದ್ ಬರೆದೆ. ಅಂಗಿ ಕುಂಟು ಪಾಡೊಂದು ಇತುಜೆ, ಅಂಚ ಅರ್ದುನ ಬೇಲೆಲಾ ಇಜ್ಜಿದೇ? ಸಾಲೆ ಪೋವೊಡು ಪಂದ್ ಇಜ್ಜಿ, ಬೇಲೆಗ್ ಪೋವೊಡು ಪಂದ್ ಇಜ್ಜಿ. ಬಾರೀ ಕುಸಿಟ್, ಬಾರಿ ಸುಕೊಟು ಇತ್ತೆ.
ಉಂದೇನ್ ತೂಯಿನ ದೇವೆರೆಗ್ ಬಂಜಾಲೆ ಆಂಡ್,
ಎಲಾ ಉಂಬೆನೆ? ಯಾನ್ ಸಿಸ್ಟಿ ಮಲ್ತಿನ ಒಂಜಿ ಜೀವರಾಸಿ ಎನಡ್ದ್ ಸುಕೊಟು ಇಪ್ಪುನು ಪನ್ನಗ ಕುಸಲಾ?
ಅಂಚ ದೇವೆರ್ ಪೊನ್ನನ್ (ಏವಾ) ಸಿಸ್ಟಿ ಮಲ್ತೆರ್. (ಇಡೆಗ್ ಆಯನ ಕತೆ ಮುಗ್ಗಿಂಡ್, ಎನ್ನಲಾ…ಪಂಡ ಇ ಕತೆ)
✍️ ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ.
ತುಲುವೆರೆ ಕಲೊಟು ಪುಗಾರ್ತೆ ಪಡೆಯಿನ ಪಿಟ್ಟಿ ಕತೆ
